趙頌茹突破底線露肉養女
前歌手趙頌茹（阿Yu）自與周永恒婚變後，為了獨力湊大兩個寶貝女而發憤做女強人，第一個復出工作就和美容院合作，誓要做個自力更生的靚媽。阿Yu雖是模特兒出身，卻從未拍過泳照，故美容院其後加碼6位數的添食費，成功令她突破性感底線，首度以泳裝上陣拍廣告硬照。着上黑色低胸一件頭泳衣，外加粉紅毛毛大褸的她，繼續大晒一對40多吋的長腿，散發女強人的自信美。
不介意晒三點式
一般女星為了上鏡時更纖瘦，都會在拍廣告前節食減肥，偏偏已有兩女的阿Yu身形依然纖瘦，更在拍攝前刻意增肥，她說：「之前真係太瘦，瘦到腳筋都現形！我覺得有肉會靚啲，瘦都要有啲肌肉先靚。」她又自嘲為「高瘦平」，但保證真材實料：「今次真係冇加缽仔糕同胸墊，我有幾多料大家都知，所以都係自然啲好，絕對冇添加，可以露嘅地方已經盡露喇。」
她更表示若再增肥後對身材有信心，不介意以三點式上陣：「我自己做形象指導，若果形象健康都接受到，大家都唔會對我有咩幻想o架啦！」
文：音樂組