楊麗虹趁嫩選美 剷青做TB

新進演員「嫩版周海媚」楊麗虹曾奪得中華文化小姐澳門站冠軍及全球城市小姐香港區最上鏡小姐，端莊外形獲得肯定。予人斯文鄰家少女感覺的Jill，原來亦有男仔頭一面，喜歡打Boxing及潛水，她說：「因為身邊好多女性朋友，我想保護佢哋，所以有時係大家姐角色，性格爽朗啲，有時都會同男仔打籃球、扒龍舟，中學玩田徑得過獎，都有運動細胞。」

問到為何會選擇參加選美，Jill表示去年一位女性朋友突然離世，令她感到人生無常，故決定珍惜青春：「呢件事令我覺得要把握時間見識多啲，可能隨時冇呢個機會，唔知下一秒會唔會輪到自己離開。」

欣賞紅姑曼玉

熱愛演戲的Jill希望做個出色演員，曾參演不少舞台劇及電影《賭城風雲》、《金雞SSS》，她珍惜每次演出機會，每次都為角色付出120%努力，不介意為角色豁出去，她說：「我讀過演藝，演過舞台劇，最深刻一次係要做TB，我剷青、染金毛同刻意減磅，上台時又唔戴Bra，希望完全代入角色中，拍《金》片時又化個好醜嘅妝，要成面眼淚令個妝溶晒，所以自己唔介意扮醜。」仍屬新人的Jill目標遠大，視鍾楚紅及張曼玉為榜樣：「我欣賞女性有韻味，佢哋兩位到依家都好有氣質，Keep得好好，事業亦好成功，我成日都會翻睇佢哋嘅電影！」

Profile

出生：4月5日　

身高：1米68　

三圍：34C、25、34

簡歷：曾奪中華文化小姐澳門站冠軍及全球城市小姐香港區最上鏡小姐，拍攝電影《賭城風雲》、《金雞SSS》、韓劇《誘惑》

文：立影