利蘊珍 「網」挑健力士

三年前Marie成立「運動燃希望基金」，頭炮籌款項目是她親自出馬踩單車穿越絲綢之路，她感謝親朋好友的支持，為基金籌得七百多萬元。而今年她將於十一月中再度為基金籌款，舉行「網球大挑戰慈善籌款」，除了是一個大型的嘉年華會外，當中還會挑戰健力士世界紀錄，基金與法籍職業網球手Jerome Lacorte合作，挑戰「網球單打最多連續對手」的健力士世界紀錄，Jerome將與不少於30名對手對賽並連續進行超過30小時；此外，當今炙手可熱的中國網球女將彭帥（女雙世界排名第一）、男子單打世界排名最高第九位的泰國球星斯里查潘（Paradorn Srichaphan）、香港網球代表金久義、張玲及David Sofarer等亦會親自落場與捐款人對打，令活動變得更有意思。

Marie謂三年前籌款是自己及「圍內人」參與，而今年則是希望將推廣運動的訊息廣泛傳播，亦希望可以與眾同樂：「除了打網球外，仲有超過20個攤位遊戲，啱晒一家大細玩，同埋希望啲人更了解運動，因為今次場地喺體育學院舉行，好多代表香港出賽嘅運動員都係體院訓練出嚟，體院平時好少開放，係好難得嘅一次機會。」

利蘊珍表示為籌備今次大型嘉年華會，花了整整一年時間。

張學友專誠錄了短片支持今次活動。

張學友親身上場

Marie為籌備今次活動，足足花了一年時間，雖然過程十分繁複，但亦欣慰獲得不少人支持，連歌神張學友亦義務相助，除了錄一個短片支持今次活動外，他還會親自上場，成為挑戰世界紀錄的其中一員，Marie說：「學友好鍾意打網球，我成日都喺網球場上見到佢，佢好認同我呢個idea，問有乜可以幫到手，二話不說就錄咗段宣傳片，希望將呢個正面訊息傳達開去。」

彭帥（中）早前應利蘊珍邀請來港出席記者會，Jerome（右）更化身粉絲索簽名。

利蘊珍致力培育新一代運動員。

Marie表示今次獲得香港網球總會大力支持，既出心又出力，她說：「今次因為要破健力士紀錄，所以每一樣嘢都要跟足標準比賽去進行，佢哋出咗好多人幫手。另外，依家中國排名最勁嘅網球員彭帥都好支持，佢除咗錄短片支持，嘉年華會當日佢會嚟香港，仲會親自落場同捐款人對打，呢啲對手平時真係無可能同場打波，所以今次真係好難得，同埋好多謝佢。」

利蘊珍與老公雷禮權及一對子女年初到挪威看北極光。	雷正殷將於十一月參加法國舉行的名媛舞會。	利蘊珍一家在冰天雪地的挪威坐雪橇。
利蘊珍大讚北極光美麗，值得一看再看。

捐款可參與挑戰

今次網球大挑戰籌款，捐款人捐十萬元就可以有機會與Jerome合力刷新健力士世界紀錄，如果捐五萬就可與彭帥、斯里查潘對打；對運動充滿熱誠的Marie，亦是網球高手，問到今次會否親自落場？她說：「我會落場，好多場都想打，但未知打邊場，因為啲人好踴躍，我要將啲機會畀其他人先，到最後先編排自己，但一定會打破健力士嗰場，希望自己都可以成為其中參與者，依家為咗編出場時間都好煩，要就啲人嘅時間，而且有啲係要通宵打。」

對Marie今次活動，家人當然全力支持，她說：「我所做嘅嘢，老公一定支持，囝囝都識打網球，佢都好想打，但因為喺外國讀書，我唔想影響到佢，所以就唔畀佢返香港。」問到今次目標希望籌到幾多錢？她說：「唔會set一個目標，當然係盡力去做，一直以來都有好多好心人支持基金，籌到愈多愈好，最希望係將正面訊息傳播開去。」

舉家挪威看北極光

　　利蘊珍雖然忙於籌備大型嘉年華會，但亦不會忽略家庭，她透露家人是最重要，所以要分配好時間，年初一與家人到挪威看北極光，她說首次實地觀看太迷人了，雖然天氣凍，但好值得去看。

另外，她亦忙於為女兒雷正殷11月到法國參加Debutante ball做準備，而此慈善舞會每年只邀請全球二十多位名媛貴族參加，女兒有幸被邀請，Marie說：「阿女依家好積極學跳舞，之前又要幫佢揀衫，個舞會一定要着Haute Couture晚裝裙，我哋冇用大牌子，搵咗個黎巴嫩嘅設計師訂造，而且父母都要陪佢去，係好難得一個機會。」