Jocelyn夫婦生B煞停 闖影壇撩打
名模夫婦Jocelyn及Anthony為了完成渴望已久的演員夢，不惜延遲生育大計，給兩年時間自己於影壇搏殺。Jocelyn大爆全家上下均是「子丹迷」，對於他們加盟子丹電影製作公司感到異常興奮，更睇晒子丹所有電影，希望他們亦如子丹一樣「打」到街知巷聞。
老闆教路 珍惜機會
Jocelyn及Anthony一向視「打得」的甄子丹為偶像，更達成夢想加入甄子丹的製作公司，老闆更為他們的演藝路給予不少寶貴的意見，二人為把握黃金機會，不惜把生B計劃押後兩年，希望為將來鋪路。
J：Jocelyn
A：Anthony
J：我最鍾意嘅亞洲演員係舒淇，有一次我喺飛機上面睇到佢主演嘅《西遊．降魔篇》，對眼就完全畀佢吸引住。覺得佢好可愛、性感又打得，真係好鍾意佢。
A：我就最鍾意李小龍，佢喺我心目中永遠係武打巨星。當然我都非常尊敬我哋嘅老闆甄子丹，佢真係好有才華，同埋佢套代表作《葉問》真係做到街知巷聞。佢對於我哋加入電影圈，都畀咗好多有用嘅意見我哋，仲分析埋依家電影市場嘅走勢，跆拳道都係佢建議我哋學嘅。
計劃將來有共識
J：對於我哋加入咗甄子丹嘅電影製作公司，屋企人好似比我哋仲興奮。我父母同我講，佢啲朋友見到我哋同甄子丹嘅合照，就好興奮咁叫「葉問！葉問！」，仲送晒甄子丹嘅DVD畀我父母，所以佢哋依家已經睇晒佢嘅戲啦！
A：我哋真係好慶幸有機會加入呢個大家庭，一定會好好珍惜每個機會。其實我哋喺幾年前計劃過喺今年生B，但係由於突然間有呢個黃金機會，所以依家改為喺兩年內生。我哋仲後生，畀兩年時間自己喺影壇度試吓。我哋做咁多嘢，都係為咗將來小朋友有更好嘅生活！
J：其實我哋依家已經有晒共識，計劃好將來要生兩個小朋友，最好一男一女，之後再領養多一個小朋友，一家五口。
努力裝備 接受挑戰
成功轉型做演員的Jocelyn及Anthony亦不敢怠慢，兩夫妻積極學習不同類型的運動，訓練體能之餘亦努力學習普通話，為打入中國市場做準備，希望把握每個機會，接受不同的挑戰！
J：其實我哋之前真係冇諗過有機會可以轉型做演員，依家我哋已經casting咗幾部戲。雖然暫時咩都未確定，不過都好開心有機會作唔同嘅嘗試。我哋最鍾意接受唔同嘅挑戰！
A：其實我一直以嚟嘅夢想都係做演員，當我仲喺溫哥華生活嗰陣，我係做演員入行嘅。係自從我嚟咗亞洲發展之後，先至開始全職做模特兒同埋DJ。依家有機會實現番我以前嘅夢想，我嘅興奮程度係十年以嚟最高o架！
學普通話最重要
J：我哋以做武打影星為目標，所以平日除咗體能訓練之外，仲一齊學好多嘢，好似泰拳、TRX（懸吊訓練）、MMA（綜合格鬥）等等，依家仲搵緊地方學跆拳道。我一直都好欣賞動作演員，佢哋真係好犀利！佢哋不顧自己嘅安危跳落樓、做好多不能想像嘅打鬥場面。有機會嘅話，我都好想試吓演一啲識飛嘅角色，可以喺大廈外牆飛嚟飛去！除此之外，我哋仲想學唱歌、跳舞，因為我哋都唔知會有咩演出機會，依家做足準備先，咁有機會嚟到嗰陣就可以捉緊！
A：目前首要係學好普通話，因為咁樣先可以打入中國市場。我哋依家有請私人老師學普通話，星期一至五每日兩個鐘，進步得好快。大家都知中國嘅市場好大，就連好多荷里活大製作都同中國合作，請中國演員演出。我哋嘅目標就係做到中國同荷里活之間嘅橋樑。
清潔沙灘 救地球
好動的Jocelyn及Anthony於夏天最愛到沙灘消遣，除了游泳及曬日光浴外，更愛玩拋飛碟。他們說：「我哋真係好鍾意去沙灘，但係香港嘅沙灘真係好多垃圾，所以我哋都會參與清潔海灘嘅活動，好好保護我哋嘅地球。」
後記：活潑好動 冇架子
在眾多模特兒中，小記最愛與Jocelyn及Anthony合作，因他們非常開朗、活潑，更時常就地取材，擺出多款生鬼pose。當天，他們決定要爬上樹上影相，當Jocelyn走近大樹時，她即大叫：「嘩！樹上面好多螞蟻呀！」但話口未完，她即毫不扭擰地爬到樹上，並專業地chok樣、擺pose。在Jocelyn身上，我完全看得見名模的專業。
文：龔凱欣
攝：劉智源
Anthony服裝：HOM