吳綺莉賞畫 「兔」盡母女情
藝人吳綺莉（Elaine）早前雖然為在香港舉行的個人畫展忙個不停，但仍抽時間偕愛女卓林到澳門欣賞中國畫家阿海的水墨畫作，寓觀摩於親子。Elaine對一幅以兔為題材的作品深深着迷，她說：「因為卓林屬兔，所以我對用兔做題材嘅畫特別鍾情！」
吳綺莉近年雖轉投西方油畫懷抱，但早年曾習中國畫的她，對中國畫亦素有研究，日前她以嘉賓身份到澳門永利酒店，欣賞「花．火 阿海澳門展」。Elaine與畫家阿海、畫展的學術主持李津、策展人陳蠻父交流，獲益不少。
畫贈卓林拒割愛
Elaine與卓林更在場內駐足細看，她對其中一幅畫作特別着迷，她說：「我最鍾意畫咗兩隻兔同一棵白菜嘅《搗藥》，因為卓林屬兔，所以我對用兔做題材嘅畫，特別鍾情！兔嘅眼神好難捕捉，我都畫過兔送畀卓林，有朋友好鍾意好想買，但我唔會賣，因為係送畀個女！有人建議我另畫一幅咪得囉！但畫家每個階段都唔一樣，畫唔番嗰種感覺，況且我作畫鍾意隨心，草稿都唔起，又點會一幅畫畫兩次？」
讚大師畫功犀利
卓林在Elaine心中可謂獨一無二，Elaine說：「有機會的話，我想同個女合作出書，初步構思係我哋以畫嘅形式嚟對答，雖然我哋兩個畫風好唔一樣，有好大對比，但我都想嘗試吓，應該幾好玩！（睇阿海嘅畫勾起創作靈感？）阿海嘅風格同內地其他畫家好唔同，佢喺水墨畫中加咗好多現代元素，好特別，佢畫功好犀利，因為水墨落紙會化開，好講究力度控制，睇得出佢經過長時間訓練，每一幅都好有觀賞價值。但我唔贊成睇人哋嘅畫去攞靈感，咁會令自己似咗人哋，而冇咗自己！」
文：影視組
攝：李廣成