嘟姐超齡送外賣 服侍o靚仔

近年無綫真人騷節目甚受歡迎，《求愛大作戰》、《沒女大翻身》及《三個小生去旅行》引來廣泛回響，本月是台慶月，無綫碌盡人情卡請來殿堂級藝人鄭裕玲、譚詠麟（阿倫）、陳百祥（阿叻）及田蕊妮等參與真人騷綜藝節目《超齡打工假期》，眾星紆尊降貴到外國做打工仔，落手落腳完成惡頂工作，考驗幾位巨星是否唔捱得。

苦笑似足湊仔

有鑑熱爆韓劇《來自星星的你》中的千頌伊好食啤酒炸雞，現實中同樣星味十足的嘟姐，亦於首爾「打工之旅」與歌手王菀之（Ivana）接受挑戰，先後到炸雞餐廳送外賣及做侍應，又到菜市場學整泡菜、做導遊及擔任藝人助手，她們一早有心理準備要受氣，故全程相當配合，沒有公主病發！兩人降呢為當地新進男子組合任助手，被服侍慣的嘟姐反過來要服侍別人，幫手執頭執尾，男團都是25歲以下的後生仔，星味未顯，難怪嘟姐忍不住說：「佢哋似我助手多啲！以前多數畀人服侍，依家好似湊仔咁！反而個男化妝師幾靚仔喎！」而幾位男新人似乎知道嘟姐的江湖地位，對她戰戰兢兢，相當客氣！

嘟姐紆尊降貴穿上制服做侍應，她也毫無「女王病」，全程投入工作。

平時被服侍慣的嘟姐，在韓國要做新進組合助手，難怪她說似湊仔。

兩人又到餐廳穿制服打工，Ivana做侍應學斟啤酒，自認方向感強的嘟姐則做「外賣妹」，外出後發現到處都是韓文，感覺陌生，但自尊心強的她堅拒問路，堅持自己以手機apps搵地方騷智慧！至於Ivana做景點接待員時手忙腳亂，最後被安排守門口負責鞠躬，認真失威！辛苦了幾日，嘟姐及Ivana到汗蒸幕休息，但有潔癖的嘟姐忍不住「爆發」，擔心公家浴衣不衞生，最後雖然照穿上身，但沒有跟Ivana一樣入鄉隨俗以毛巾綁頭。

王菀之做侍應學斟啤酒。	譚詠麟、陳百祥和彭健新到黃金海岸做救生員，工作都唔簡單o架！	阿倫和阿叻又做樹熊管理員。

阿叻做救生員

至於阿倫、阿叻與彭健新則到澳洲捱世界，他們先到黃金海岸做救生員，三男一齊衝向海時，感覺猶如「長者渡海泳」，相當搞笑！他們樂在其中不停Chok甫扮大隻，阿倫笑說：「有冇見過咁靚仔嘅救生員呀？」另一日阿倫到中菜館做廚師，外號食物焚化爐的他竟邊煮邊偷食，幸好其廚藝獲讚，他說：「我一直都話整海南雞飯唔錯，大家好質疑，今次有機會炮製鮑魚、皇帝蟹，個個都讚有專業水準！」

做侍應的阿叻晒口才，成功向外籍人士推銷最貴價逾8千澳元（約54,560港元）的海鮮餐，他說：「嗰兩公婆係退咗休嚟享受生活，呢餐有蠔有蝦，隻皇帝蟹仲係鎮店之寶，就係畀阿倫整o架囉！好在冇整壞！（打工辛苦？）唔辛苦，好Enjoy！（覺得降呢？）一啲都冇呢個感覺，我哋後生嘛！應該試下唔同嘅嘢。」

小生再去旅行

屬台慶月巨獻的《超》將於本月10日起分四輯共15集播出，自早前無綫內部裁員換血後，可謂部門員工精英化，由綜藝科總監余詠珊構思的《超》坦言是部門換血後首個作品，而第二輯《三個小生去旅行》亦籌備中，今次小生人選正考慮加入胡楓好友曾江，相信曾江、胡楓及謝賢這三大粵語片小生碰頭會更有火花。

文：影視組