糖妹邂逅暴力Oppa轉冧矇豬眼
兩位單身美女林欣彤（Mag）與黃山怡（糖妹）自爆擇偶條件，向一眾男士放「貼士」！Mag最愛細心男，收禮物講求心思第一；至於糖妹自與韓國「暴力Oppa（韓語哥哥）」邂逅後，轉軚迷上韓風矇豬男！
林欣彤與糖妹昨日出席卡通人物Hello Kitty展覽開幕禮，經過悉心裝扮的她們與人形Kitty合照，可是穿上7厘米高厚墊鞋的糖妹仍比Kitty矮一截，場面搞笑。糖妹自言小時候因跟風而愛上該卡通人物，長大後開始購買不少其造型日用品，心頭好是Kitty多士爐，因每次用來炮製大餐後，都有充滿童真的感覺。
讚韓男有風度
剛從韓國回港的糖妹表示在當地玩遊戲攤位時，與韓男經歷一段「暴力邂逅」：「其實都幾暴力，因為要揼碎晒啲瓦片先換到公仔，我開頭都換到，但之後換塊厚啲嘅瓦片，有個韓國男仔幫我手。開始發現佢哋比較有風度，好Fashion，但瘦弱咗少少。」被「Oppa」迷得一陣陣的糖妹更自爆中途轉「矇」：「第時喺香港要識個似韓國人嘅男仔，依家覺得矇豬眼幾有型，以前我係鍾意雙眼皮。」
想上巨聲挑機
至於與糖妹同屬單身一族的Mag，對收異性禮物重實用還是美觀？她說：「如果嗰排需要實際嘢，佢送畀我就覺得幾細心。如果我行街讚過件禮物靚，佢又記得，都會加分！」提到《超級巨聲4》出街後，有網民指參賽者表現麻麻，貴為巨聲大師姐的她表示第一集難免會表現緊張，自爆希望上台挑機：「超想去，因為上到去唔會理邊面贏，反而首歌唱得好聽，啲人會繼續聽。」
文：音樂組