子丹過招被箍捧仔做打星

甄子丹、內地女星白冰、思漩及影壇新貴王嘉慧前晚代表英皇電影《一個人的武林》出席由導演陳德森發起的「香港動作特技演員公會」慈善首映禮，楊受成及一眾「武林人士」元彬、楊盼盼、姜大衛等均來撐場，不少中港台藝人包括謝霆鋒、彭于晏、黃曉明、文詠珊等也響應捐款，而當晚已籌得近港幣300萬善款，會長錢嘉樂則代表接受大支票，基金則幫助受傷的動作特技員或同業及照顧年老的前輩。

周身傷冇claim錢

子丹表示每次拍戲均由電影公司買保險，笑稱自己周身傷「從來冇claim過一毫子」。他又盼望12月能停工休息，多參與親子活動，並謂曾與兒子「隻揪」，大讚對方好大力：「囝囝學緊MMA及跆拳道，好想同佢一齊喺地下碌。（親自教功夫？）暫時未，我冇時間，等人教吓佢先，但有時都會畀tips佢，試過同佢玩MMA，箍到我唞唔到氣。」會否讓兒子入行做打星？子丹謂言之過早，但不排除這個可能性。

元彬（右起）、錢嘉樂、甄子丹、白冰一齊祝酒。

楊受成

白冰辛苦值得

白冰透露為該片苦練三個月武功，每日練到體力透支甚辛苦，但早前於倫敦電影節獲一致好評，故認為有好導演、演員、劇本都樂意再拍動作片。出自電影世家的王嘉慧，乃已故資深電影人藍天虹之外孫女，她表示恨與子丹、惠英紅、謝霆鋒合拍動作片。

文：影視組