子丹遊完世界 湊仔大過天
「宇宙最強」甄子丹返港出席新片首映時，盡顯鐵漢柔情！因公幹遊歷了地球一圈的他，自爆返港後爭取時間接送子女返學，更於飛機上與老婆「拍拖」。提到獲邀與羅拔迪尼路或阿爾柏仙奴「鬥戲」，子丹直認不諱，對與前輩級影帝合作相當期待﹗
因拍戲離港多時的子丹昨日終「強勢回歸」，出席其主演英皇新片《一個人的武林》首映，拍檔楊采妮、白冰、導演陳德森、英皇老闆楊受成夫婦、太陽娛樂文化老闆周焯華、蔡志明夫婦等現身，女模崔碧珈則打扮性感搶鏡，場面熱鬧。提到子丹被傳獲邀演荷里活製作的《Noodle Man》，有機會與羅拔迪尼路或阿爾柏仙奴合作，子丹笑謂：「係呀，傾緊囉，傾得成就會明年拍完《葉問3》之後開工，能夠同前輩級影帝演員合作，梗係相當期待啦！」
楊采妮從影最惡
早些忙拍戲及出席活動的子丹笑言環繞地球飛了一圈，由新西蘭、倫敦、溫哥華再到海南島，很抱歉忽略了家人，他表示﹕「返到嚟梗係接仔女返學放學，見吓老師了解佢哋嘅學業進度，好彩之前太太陪我去溫哥華公幹，搭咗廿幾個鐘飛機，咪當拍拖囉。」
兩位「靚靚人妻」楊采妮（Charlie）及白冰，不約而同於《一》片竣工後披嫁衣，難怪前者笑指該片「很旺」。於戲中扮演惡死女警Charlie的說：「係入行以嚟最惡嘅角色。（期望老公見到有咩感覺？）都要畀佢見啦，我平時唔鬧人，好嬲最多唔出聲，因為驚精緒問題亂咁講嘢。」白冰則稱於戲中化身打女，期間更傷及腳踭，獲導演先拍文戲以便「養傷」。
樊少皇避談情變
另外，樊少皇現身時，被追問有關疑與女友賈曉晨分手一事，他避忌地說：「今日嚟睇首映，講電影啦，我喺橫店拍劇，聽朝趕住返去開工。（感情生活點？）今日支持電影，唔講感情嘞。（幾時講？）遲啲、下次先講啦。」
文：影視組