蔡思貝同黃德斌互電失火
無綫新劇開工拜神，黃德斌笑指無懼蔡思貝「發電廠」本色，更直言：「淨係佢識電人呀？」而緋聞多籮籮的思貝就指冇人信自己同德斌傳緋聞，至於唐詩詠就呻「新歡」洪永城未夠主動：「女仔係等人約！」
藝人黃德斌、袁偉豪、陳庭欣、唐詩詠和蔡思貝等昨日在將軍澳電視城出席無綫新劇《當鐵馬遇上戰車》開工拜神儀式。雖然德斌劇中飾演思貝的師傅，卻笑言對方才是師傅：「佢係港姐，美貌與智慧並重！」問有否被「發電廠」思貝電親？他謂：「佢冇向我發電。（懷疑自己魅力？）我係鍾意女仔o架！（佢電你點算？）我電番佢，睇佢死未，淨係佢識電人呀？可能電到出晒火、起火呀！」相當搞笑。
思貝自爆劇中被德斌鬧到眼濕濕，但不怕跟對方傳緋聞，她笑言：「冇人信啦！我哋以兄妹相稱。」她又坦言雖然劇中角色搞笑，但比起拍《衝線》時更須注意對白：「上套就飾演90後，講嘢文法錯晒，佢哋都覺得可以，但今套就要正確啲。」
唐詩詠嫌洪永城冇心
至於有報道指唐詩詠繼續上舊愛崔建邦住所，疑似仍管有對方家中鎖匙。她斬釘截鐵否認有鎖匙，當日只是接共同撫養的愛貓「銀仔」離開，又撐舊愛識18歲件o靚模亦冇問題：「我都戥佢開心！」至於與「新歡」洪永城發展進度，她謂：「得閒都有短訊。（好耐之前都係！）佢冇心！（主動約佢？）我上海返嚟冇耐就開呢套劇，女仔係等人約！」
文：影視組