祖兒恐失明 懶得望師兄
樂壇天后容祖兒昨日眼紅紅出席時裝活動，她自爆年輕時因做激光矯視以致淚水分泌不足而眼紅，並自嘲有機會成為香港首位失明女歌手，正考慮是否接受手術。
昨日祖兒現身I.T旗下Acne Studios專門店開幕，見她雙眼發紅，她透露剛覆診，醫生指她十多年前做激光矯視留下後遺症，經常眼乾及眼紅，她正考慮是否接受手術堵塞排淚管：「咁令隻眼唔會咁易排走啲淚水，等對眼潤啲。（手術有冇風險？）應該冇啩！」
「盲炳」帶眼識人
祖兒戲稱該眼疾為「熱情的沙漠」，又指若情況惡化，自己將成為香港首位失明女歌手，她承認此病影響日常生活：「除咗眼乾同紅，仲影響到個頭同鼻唔舒服。夜晚要搽眼膏瞓潤住對眼，夜晚起身成日撞到枱枱櫈櫈，有啲盲炳咁，做咗夜盲人。」現時她常戴超護眼，說話亦不望人。男友劉浩龍（師兄）可有心痛？她說：「你問吓佢。（同男友冇眼神接觸？）冇，冇晒社交生活。」
對於同公司的歌手鄭希怡（Yumiko）預言祖兒將會下一個結婚，她笑笑口說：「多謝。（有冇信心做下一個新娘？）我冇諗，冇計劃，搞好對眼先，帶眼識人睇清楚啲。（睇幾耐？）你哋話事，我唔知，我冇諗呢個問題，你哋緊張過我。（出年？）咁又快得滯。」
Yumiko估祖兒嫁
此外，前晚祖兒與許廷鏗、丁子高同出席「福慧教育基金會」晚宴，許廷鏗與十多名許氏家族親友到場，笑言是家庭聚會，一於寓工作於娛樂。丁子高則大讚老婆楊千嬅是萬能媽咪，自認是嚴父的他說：「我唔使鬧個仔，望一望佢就已經醒定。」而Yumiko日前上TVB娛樂新聞台節目《StarTalk》，重提祖兒接到她的花球估計祖兒為下位人妻：「阿Sa（蔡卓妍）應該未啦，因為陳偉霆喺內地嘅事業啱啱起步，阿嬌有拖拍，但未穩定，係祖兒啦。（阿嬌未穩定？）意思係未有拖拍！」
文：名人組