鄭希怡冷落新婚老公
人妻鄭希怡（Yumiko）近日變成大忙人，既要宣傳新碟又要打理網上時裝生意，新婚未夠一年經已「冷落」老公梁學儲（Andy），Yumiko笑言：「叫佢忍下啦！」
上月補擺完喜酒的Yumiko，現收拾新婚心情為新碟宣傳。早前Yumiko為新歌《花球寄語》的MV親自構思，收集去年在蘇梅島舉行結婚派對的照片，再精心炮製成MV。她謂：「我係向當日有份去嘅朋友收集番啲相，事隔都有十個月，所以要收集都唔容易。要『請求』幾次，啲朋友先記得做，大大話話都收到四、五千張，都幾多o架。」Yumiko表示這個構思最能配合歌曲內容，亦順道送給自己一次最難忘、最美麗的婚禮紀錄。
滿意業績
Yumiko最近宣傳新碟之餘，又要分身打理她的網上時裝生意。她坦言比想像中花更多精力和時間，在公司每日要處理不同問題、嘗試實行構思，更由不懂計數進展到成盤數自己打骰，大嘆終於體會到做生意是毫不簡單。網店現時開業四個月，身為老闆的Yumiko大表滿意：「剛過咗試用期啦！（成績如何？）業績好滿意，要加佢哋人工先！」
問到只顧做女強人可會冷落了老公？Yumiko笑言：「都有o架，依家對住部電腦多過對住佢！（結婚未夠一年喎？）忍多一陣啦，等盤生意上咗軌道就得，好快嘅。（上完軌道就專心造人？）呢方面我哋都有共識，未有造人打算。」（意外好難預計？）Yumiko則抵死自嘲：「講意外嘅嘢，我真係唔敢講。大家都知我幾多意外發生啦，希望呢樣唔會啦。」
文：音樂組
服裝：whysocool