婷婷甜入心霎時恨嫁

女星謝婷婷跟混血男友戴尚安(Sean)感情穩定,她昨晚帶病出席活動,自爆男友照顧入微,更夜半送上滋潤湯水,令她甜在心頭,頓有下嫁衝動!

昨晚L'ECOLE Van Cleef & Arpels梵克雅寶珠寶及腕錶學院開幕,不少名人明星如謝婷婷、葉德嫻及名模馬詩慧等現身撐場。其中婷婷表示自己感冒在身,更不時咳嗽,記者笑問是否被男友Sean傳染?她說:「係我傳染畀佢就真,佢昨(前)晚仲有攞湯畀我飲,仲錫咗我一啖,(對你好好?)佢真係好照顧我,好sweet,因為佢自己都好忙,夜晚十一點先食飯。(嫁得過?)都係向住呢個方向,因為大家都差唔多(結婚)年紀,身邊人唔係結婚就生BB。(父母及哥哥離婚對你可有影響?)唔會,咁爸爸媽咪都係朋友,而哥哥依家嘅情況都幾得意,過咗十一年後再一齊,雖然離咗婚,但喺佢生命中都係正面。」她又表示未見過王菲,希望一家人可以在聖誕節聚會見面。

馬詩慧自嘲貪慕虛榮

而影后葉德嫻就自言好學不倦,很有興趣來上珠寶課程,對於珠寶寶石的來源和製作過程均感好奇,問她可有收藏珠寶首飾?向來搞笑的她即說:「冇乜,我窮嘛!」至於名模馬詩慧就自嘲貪慕虛榮,從小就很喜歡珠寶首飾,而自己亦有興趣做設計,希望在兒女21歲和跟老公王敏德結婚25周年時設計首飾做紀念,她笑說:「仲有3年就結婚25年喇,時間過得好快,(點樣保鮮愛情?)帶多啲保鮮紙出街啦,哈哈!」

文:名人組