JC夠硬淨 爆發打女格
性感女星Jessica C.（JC）及肌肉型男安志杰（Andy）在新片《屍城》中與喪屍搏鬥，驚險場面不斷，JC更打到虛脫險暈！對於Andy以寡敵眾，JC大讚是英雄，怕醜的Andy即面都紅晒！身兼動作指導的伍允龍盛讚JC夠硬淨，有做打女天分！
JC、安志杰與伍允龍孭飛的電影《屍城》，以港產片甚少拍攝的打喪屍為題材，加上眾人在片中演出賣力，JC愈打愈少布，不乏晒事業線的香艷鏡頭，Andy則騷爆肌，苦戰大批惡形惡相的喪屍，「一錘一個」，官能刺激十足！
甚多追逐戲的JC出盡力應付動作場面，其中一場狂斬喪屍，更激動得缺氧險暈，問到有否受傷？她說：「唔係肉體受傷，係好攰，佢哋班男仔表現到好易咁，我就覺得好難！（想做打女？）都想！但仲有好多嘢學，先要學畀人打嘅節奏。」對於男主角Andy，JC表示兩人並肩作戰：「片中佢係唯一照顧我嘅人，佢係英雄！」
靚女讚英雄面紅
獲讚英雄的怕醜仔Andy即面紅，他亦對JC讚不絕口：「佢性感又酷，人又好善良！令身邊嘅人都好開心！但戲入面竟然冇感情線！好失望！」但他表示跟另一女角袁嘉敏（Candy）有錫戲補數，還被穿上SM裝的Candy鞭打：「不過佢太用力！整痛我！」向來愛打機的Andy直言片中狂打喪屍，猶如將遊戲搬到真實世界，感覺很爽！
伍允龍度招唔難
身兼動作指導的伍允龍表示花了不少工夫設計打喪屍場面，希望創造非一般的「人屍厮殺戰」，對於好兄弟Andy的打鬥功力當然收貨，他亦讚JC認真又捱得，有做打女潛質：「佢好努力，就算跑緊、做緊動作都會留意演技，最後佢打到剩番件背心又濕水，好凍，但都冇怨言。（JC衣着咁性感，度招會好難？）唔難！放心！冇嘢飛出嚟！」
文：立影
攝影：劉斌
服裝：Club Monaco（JC）、MCS（安志杰）、TOUGH Jeansmith（伍允龍）