王晶反佔中 同秋生阿澤何詩絕交

擅拍笑片的王晶近日在微博就佔中表達個人看法，更就日前龍和道警方與示威人士衝突事件，發表撐警言論：「我依然撐警察！人家執行職務，你居然用尿潑人？打死都冇得怨！我覺得打得少！」結果惹來大批持相反意見的網友留言攻擊，但王晶無懼犯眾怒，照樣留言反擊。

不過，事件至昨日突然升級，王晶在微博公開表示要與「道不同」的「佔中福祿壽」黃秋生、杜汶澤及何韻詩「劃清界線」：「黃秋生先生，杜汶澤先生，何韻詩小姐，我們曾經有過很愉快的合作。我也尊重你們可以有個人的政治主張。但絕不認同。為免尷尬，你們的聯絡方式將會在我手機及電腦刪除。祝生活愉快！」

秋生多謝王晶多年關照，祝他一路順風。

何詩表示與王晶完全冇私交，何來聯絡電話。

「唔猜度人哋動機」

有網友見狀加把嘴，留言：「王晶終於把自己也變成一個笑話……天林叔在天有靈也會為你覺得羞恥。」王晶疑不滿父親王天林被擺上枱，遂因父之名爆粗反擊：「天林叔只會同我一齊Ｘ你ＸＸ！」雙方勢成水火，有你冇我！

杜汶澤	王晶與阿澤之前才合作電影，現成陌路人。

「佔中福祿壽」對於被unfriend反應各異，身在內地的秋生起初質疑「unfriend留言」是否真的出自王晶本人，及後證實確為王晶留言後，秋生說：「覺得奇怪啲，但冇乜感覺，每人都有自由。（你哋成日傾社會議題？）冇，傾拍戲同講笑，我唔掂個期，拍咗好多佢嘅戲，呢行好多人艱難時期都係多得佢幫忙。（搵王晶本人傾番件事？）唔需要，若果劉青雲、黃子華同我割席，我就會問係咪誤會？但佢係影壇泰斗，前輩要割席，我可以點？只能夠打就企定！delete咪delete，又話避免尷尬，講出嚟咪仲尷尬？都唔成立嘅，好怪！（點睇unfriend潮？）好似小學生絕交，『你唔好過界呀！』但unfriend咗真係搵唔到咩？個電話號碼喺個電話度好滋擾咩？成件事都好怪異、奇怪，小朋友咗啲，作風同我認識嘅佢非常唔同，我分析唔到，真係好奇怪！（佢想公開同你哋劃清界線？）唔猜度人哋動機啦！」

秋生被問到會如何對待異見人士，他說：「結婚！我老婆同我意見都好分歧。其實唔使傾啦，你基督教，佢回教，總之自由社會，各有各信，只要唔使兵戈相向。（心痛社會撕裂？）我反而覺難得喎，香港咁多年嚟對政治咁有態度有幾何？所以我絕對尊重。」

「祝佢性生活愉快」

杜汶澤則寸爆：「又唔見佢講周潤發？佢份人，我好明，是但啦！祝佢性生活愉快！」何韻詩則說：「唔好意思，我最近比較忙，唔得閒回應呢啲雞毛蒜皮。」

王晶昨在電話揚言不與「佔中福祿壽」合作，他說：「杜汶澤講過反佔中嘅唔係佢朋友，我係反佔中嘅！（佢祝你性生活愉快？）唔回應，我唔係針對某個人，只係講我個人嘅立場。（點解淨係同佢哋三個絕交？因為佢哋偏激？）係！加上有人成日唔喺香港，講嘢有誤導成分。（秋生唔信你話唔合作？）唔回應。」

此外，秋生於昨晚八時許亦在facebook寸爆表示「好感動」：「晶哥，多謝你咁多年咁關照我，估唔到你仲有我電話添，連我取消咗十年嘅電郵都有，我真係好感動，我咁多年都冇你電話，好慚愧，喺最後時刻，同你講聲對唔住，祝你一路順風！」

至於何韻詩跟秋生一樣在facebook寸王晶，指根本冇對方聯絡電話：「其實我想話呢……我哋完全冇私交喎，點解會有我電話呢？一係就特登問人攞我電話入落電話度再刪走，一係佢就只不過係unfriend咗我個經理人。無論如何，估唔到大家咁重視我，多謝賞面thank you very much！」

文：影視組