婷婷一面之緣 讚阿菲溫柔

謝婷婷昨日出席i.t 2014秋冬時裝騷及鞋履展，並為其中一場時裝騷行騷，同場的嘉賓還有歌手陳慧琳、關楚耀、洪卓立、Super Girls和模特兒傅嘉莉等。婷婷表示換季有很多時裝騷行，但有很多工作都因為佔中運動而延期了，她說：「我之前去咗倫敦同意大利做fashion week，又去咗紐約探朋友。男朋友冇一齊，今次係我哋分開最耐嘅一次，成三個禮拜，我哋有日日傾電話，掛死都有，其實少見代表大家都多工作。我哋嘅關係好穩固，好似石頭咁。」

兄妹cool爆唔問戀事

提到鋒菲復合一事，婷婷說：「我之前喺意大利時助手有講我知。（恭喜咗哥哥未？）我淨係問佢喺邊，尋日問咗，佢話喺北京。佢一生人每次有拍拖我都唔會即刻去恭喜佢，我哋兩個都扮cool。上次我哋喺上海第一次同台工作，喺台上我好想撲埋去佢度，但佢離我一尺同我握手，好cool。（佢請假一個月陪王菲？）我唔知。（你冇問？）問謝霆鋒分享佢哋感情事？好奇怪囉。（支持哥哥？）當然我好開心佢終於有得愛，可以愛人同被愛，人生係為愛而生存，佢離婚後已經有一段時間冇拍拖，哥哥開心就得，無論係同邊個都好。（媽咪有冇投訴？）我好耐冇見媽咪，爹哋就見過一次，但都冇講呢啲。（想唔想哥哥約阿菲出嚟同你見吓？）我真係從冇見過佢哋一齊，佢哋之前拍拖時係我同哥哥最疏離嘅時候，我仲讀緊書。我有見過阿菲一次，嗰時佢同哥哥拍緊拖，我入升降機佢出升降機，佢好溫柔咁同我say咗個hi。」

陳慧琳以一身韓風打扮睇騷。

傅嘉莉（中）與Super Girls一起行騷。

陳慧琳遲來《星星》熱

同場的陳慧琳以一身韓風秋冬打扮示人，問到她可有喜歡的韓星，她說：「梗係《來自星星的你》嘅全智賢同金秀賢啦，仲有以前同依家都鍾意嘅大長今李英愛，超靚。（老公同金秀賢邊個靚仔啲？）都唔同，一個內在一個外在，唯一係劉昇（長子）靚仔過金秀賢。（細仔小龍包呢？）好啦，畀埋佢啦。（有冇追開韓劇？）我好遲先睇，啲熱潮過晒先睇。（想同邊個韓星合作？）全智賢、李英愛、金秀賢同李敏鎬。」她又透露大仔很愛吃韓國美食，特別是韓式烤肉。

王菲、謝霆鋒

關楚耀（左起）、胡鴻鈞、許廷鏗、洪卓立與方皓玟都愛睇靚衫。

文：名人組