山內藍檸水闖禍 Lea T.操肌挺胸
夏日快將結束，來自斯洛伐克的模特兒Lea T.與日模山內藍也把握機會作終極一曬，齊齊穿上比堅尼大晒C級索爆身材。山內藍曾試過地獄式節食，最終發燒收場，此後大叫怕怕，相反Lea着重健康減肥，認為只有運動才能鍛煉出迷人線條及堅挺上圍。
日模山內藍來港發展年多，放假最愛到海灘，她日前趁天氣還未轉涼，爭取時間到沙灘嬉水曬太陽。穿上比堅尼的她身材fit爆，身為專業model的她當然要時刻keep住最佳狀態，別以為她天生吃不胖，為了這副33C、24、34的噴血身材，她可是下過不少苦功。
幾乎暈倒家中
她說：「我啱啱嚟香港嗰陣，因為香港啲美食太好味，好似叉燒、菠蘿油同點心等等我都好鍾意食，食到肥咗好多，咁當然要地獄式減肥啦！我用咗一個飲檸檬水嘅天然排毒減肥法，為期10日，只可以淨飲檸檬水，過程好痛苦，到咗第10日，我就發燒，成個人無晒力幾乎暈喺屋企，雖然瘦番晒，但以後都唔敢再用呢個方法減肥。」
每周有零食日
至於霍啟山緋聞女友Lea T.不但擁有34C豐滿上圍，更有結實腹肌及圓渾臀部，所以毫不介意大騷美好身段，鼓吹健康的Lea並不鼓勵節食，她解釋：「咁樣唔健康，但我每年都會抽三日只飲果汁去排毒，可以淨化體內，我多數會揀農曆新年進行，因為新年食得太多嘢，要清清腸胃。」她指平日食得健康，但每星期也會安排一日作「零食日」可以吃自己最愛的零食作放鬆。
她稱保持身材均勻全靠運動，她說：「我每日都會健身，風雨不改，我唔鍾意女仔太瘦或者得棚骨，我覺得女仔有肌肉先好睇。」她表示健身才能練出條線，令身形結實及胸部堅挺。
文：名人組