鍾楚紅醉紅時代
一年兩度的紐約時裝周與兩年一度的巴黎古董雙年展均已華麗結束，眾女星都打扮得省鏡，各展美態與型味。星級造型師郭慶彬（Ricky）盛讚蜜糖膚色的鍾楚紅穿起酒紅色貼身晚裝裙，散發高貴的體態美；拖尾貼身晚裝裙並非人人撐得起，但穿在身形豐滿的鞏俐身上，絕對相得益彰，更凸顯她的葫蘆身形；而Angelababy的牛女造型配搭富層次美，集青春、活力與型格於一身。
鍾楚紅
酒紅色晚裝裙顏色好搶眼，又可以凸顯到佢健康蜜糖嘅膚色，而貼身剪裁又騷到佢葫蘆曲線，配襯珠寶鑽飾，感覺好高貴得體。
鞏俐
拖尾貼身晚裝裙過瘦真係着得唔好睇，佢勝在有肉底撐得起，低V設計健康性感，着到佢身形比例好修長，配搭埋珠寶鑽飾，令造型更錦上添花，好有艷光。
Angelababy
好靚，好啱佢年紀，牛女造型好有層次美，青春得嚟有活力，加埋帽、boots同飾物，成件事都配搭得好match，型！
舒淇
黑白配搭一般，係有中性美，效果唔係最理想，褸款有型，但恤衫斯文咗，改襯白色T-shirt同埋背心，更fashionable，同埋耳環過長，有啲累贅，如果唔襯耳環，感覺仲簡潔。
高圓圓
成個感覺乾淨簡單，黑白造型配搭clutch同露趾高跟鞋加咗分，好有時尚感。如果襯錯斯文尖頭高跟鞋會好老土同保守，梳個all back髮型，仲能凸出佢個靚樣。
張靜初
打扮斯文咗啲，呢條花裙剪裁唔夠貼身，花圖案成熟過籠，加埋妝容同髮型，好普通，冇星味，銀手袋同鞋配搭都OK，係條裙款出事。
張雨綺
運動造型着唔出sporty chic感覺，套衫係靚，但就襯到娘娘哋，加上佢個斯文樣，刻意扮細個、扮型同潮，完全唔啱佢。佢想型得夠sporty，唔需要一定強行加頂cap帽，反而紮條馬尾，會仲清爽好睇。
黑白長勝
黑白色贏盡時裝界，係永恒顏色，即係永不過時，除咗設計師愛用黑白色創作外，相信你、我、她都愛黑白配，貪襟興又易襯。如果不想黑白太單調，只要配襯小飾物，就可以凸顯到簡單就是美的時尚效果。
Profile
星級造型師郭慶彬（Ricky）的配搭功架深受眾女星讚賞，是型媽吳君如、「大美人」李嘉欣與「玉女掌門人」周慧敏等的御用造型師，在業界備受肯定。Ricky亦是一眾品牌之友，經常被各大品牌邀請出席米蘭與巴黎時裝周，還會為品牌在尊貴活動上充當講師，與VIP分享與傳授配搭之道。