王曼喜遺傳馬詩慧 大將風範

兩母女購物狂

晴天時：Janet天生愛購物，而Kayla也獲得真傳，兩母女一拍即合，Shopping成為最好的親子節目。

J：我哋好鍾意一齊行街睇衫，大家都鍾意捐窿捐罅搵靚嘅嘢，專行細舖仔、Outlet，買到平嘢會好有滿足感。因為太鍾意買嘢，屋企擺到幾乎冇位企添！細女（王麗嘉）就完全唔鍾意行街，睇兩睇就冇耐性，每次行街佢都係有目的咁行，呢方面好似Michael（王敏德）。細仔（王躍穎）都會陪我哋行街，但我唔想成日孖住佢行，對男仔嚟講會好戇居，唔想佢第時又係咁成日跟住女友尾行街。不過依家同Kayla行街係要約，因為我唔係佢嘅第一選擇，佢嘅第一選擇係佢個朋友（女友Lia）。將心比己，自己都唔會要求太高喇！

兩母女感情要好，馬詩慧更放下名模形象向女兒扮鬼臉。

王曼喜公開承認與Lia的關係。

K：我都鍾意同媽咪行街，佢眼光Fashion啲。如果我自己行鍾意買乜就買乜，係購物狂，但同媽咪行街，好多時我揀咗四、五件，佢會幫我篩剩兩件。其實我好多朋友都鍾意同媽咪行街，因為大部分朋友嘅媽咪都係靚媽咪，哈哈。

王敏德與馬詩慧育有兩女一子，經常一家人出席活動增進感情。	王麗嘉（右）雖然不是同性戀者，但非常支持姊姊王曼喜出櫃。	馬詩慧視子女如朋友看待，但必要時亦會嚴母上身。

不聽負面說話

陰天時：今年四月Kayla出席活動正式公開與外籍女友人Lia拍拖，母女立即成為傳媒的追訪目標。兩人一齊經歷雨天，可謂風雨同路。

J：佢近排經歷係比較多，雖然（出櫃）唔係一件好大嘅事，但對佢嚟講要突然面對咁多人，唔止屋企人同朋友，仲要面對傳媒，但佢都Handle到，幾有我大將風範，哈哈。

K：兩年前我同媽咪講呢件事（出櫃），我哋冇因為咁而鬧過交，只係好激烈咁傾過。

J：在我嚟講唔算激烈，都未拍枱。我哋係有唔同意見，嗰日Kayla同我傾咗都唔係好耐，傾咗十幾分鐘，之後都冇再講呢個話題。

K：我一向好少講自己嘅感情生活，同朋友都少講。我鍾意做聽眾多啲，鍾意聽佢哋嘅問題。我覺得感情係個人事，我鍾意自己決定自己嘅事，人哋會加入一啲負面嘢，我唔太鍾意聽太過負面嘅嘢。

J：都可以聽吓人哋分析嘅。

K：聽得多我會頭痛。

J：佢係好自我。

K：某啲話題我會聽媽咪講，但某啲人我會選擇唔出聲，因為我知道佢嘅反應，我會好選擇性同人講嘢。

J：Kayla唔係對每一個人都會公開自己，佢會同某啲人講某啲話題，知道同邊啲人講會有最大得着。

K：我同佢（Lia）乜都講，佢好有遠見，會計劃五年十年後做啲乜，好有創意。我好欣賞有創意嘅人，所以我哋好夾，大家有共同目標。我嘅目標係將來建立自己嘅品牌，用作慈善用途。

愈熟愈多問題

雨天時：三年前Kayla不理Janet反對去紋身，此事令Janet嬲爆，母女冷戰了幾個月。但Kayla未有吸收教訓，過了不久第二度紋身，母女再陷冷戰。

K：手臂呢個紋身寫住「go with the flow」，係三年前我喺LA時嘅心情。嗰時我諗好多嘢，紋呢句說話係想提醒自己唔好諗太多，有乜嘢事，要發生嘅就隨心去做，順住水流直去。係唔係發生咗啲唔開心事？唔關事，呢個只係代表我當時嘅感受。

J： 點解要紋身？呢個係我第一個問題。

K：問咗媽咪兩次，佢都話唔可以紋。

J： 但最後都紋咗，咁問我嚟做乜？點解唔可以畫低喺畫布度？得閒攞出嚟睇吓都得啫，紋身冇得洗走。嗰次嬲咗佢幾個月，係嬲佢最耐嘅一次。

K：其實我冇諗過媽咪會嬲。

J： 如果你諗過我嘅感受，就唔會去做。

K：但係試咗人生豐富啲。

J： 咁不如去試埋不良嗜好？我講吓咋！

K：我覺得紋身係一種藝術，我鍾意紋身。上年喺香港紋咗第二個紋身，係一個箭嘅圖案。

J： 今次佢冇再問我啦，結果我嬲咗佢兩日。

K：自己唔係好識得氹媽咪，可能太熟，又唔知點氹。我諗個個屋企都係咁，關係愈親密就愈係咁。我同媽咪溝通多過同爹哋，但愈熟就愈多問題出現，仲多數係媽咪嬲我，好少我嬲媽咪。不過我哋唔會鬧交，只會冷戰。

J： 我哋唔會鬧出口，唔會發癲，最多你一句我一句，通常是但一個叫停。其實我哋唔算拗撬，係大家都有唔同意見，佢咁大個人自然有唔同意見。

後記：鬥完嘴攬頭攬頸

與Janet母女做訪問，真正感受到她們互相有愛。兩母女性格相似，是性格直率的人，受訪期間亦毫不掩飾喜與怒，甚至在記者面前鬥嘴，但之後不消兩分鐘又和好，攬頭攬頸露出燦爛笑容。

文：Tracy Leung　

攝：張福宏　

場地：Pure Yoga