嘉玲赴京分享阿菲喜悅
劉嘉玲前晚演畢英皇舞台劇《杜老誌》，事後受訪時談到好友王菲與謝霆鋒復合，嘉玲表示由衷支持，且送上無限祝福，更揚言會趁北京公幹期間，探望熱戀中的阿菲。同場的梁家輝亦認同鋒菲世紀復合很戲劇性：「咁我哋係drama人嘛。」
由劉嘉玲、梁家輝及謝君豪主演的威利來干邑呈獻英皇舞台劇《杜老誌》第二輪演出前晚圓滿落幕，謝幕期間多次掌聲雷動。大會於完場後安排一眾主角祝酒及會見傳媒，期間宣布明年1月17日起加開第三輪15場演出，心情大佳的嘉玲更多次向台下送飛吻，可見她心情靚爆。
唔怪老友隱瞞
對於王菲與謝霆鋒復合一事，身為阿菲好友的嘉玲接受訪問時向記者笑說：「終於問呢樣嘢嘞？」之後嘉玲強調對鋒菲復合事先並不知情，問會否怪罪阿菲刻意隱瞞戀情？嘉玲表示：「梗係唔嬲，做朋友嘅嘢，最緊要佢開心啫。（知道佢哋一直有聯絡？）應該有啦，朋友嚟嘛。愛係一件好美好嘅事，如果係真嘅話，我由衷祝福佢哋。」嘉玲又透露昨日飛往北京公幹，笑言會抽時間與阿菲見面。
梁家輝聞得嘉玲談及鋒菲復合即笑謂：「愛唔係要周圍講嘅，我同嘉玲都開花結果，一地都係呀。（今次復合好戲劇性？）咁我哋係drama人嘛。」他又抵死說：「恭喜你哋攞到單咁嘅嘢。」
《杜老誌》撲飛熱
由於外界對《杜老誌》反應熱烈，有指出現嚴重撲飛熱，對此家輝搞笑說：「咁有冇iPhone咁勁先？真係要休息吓，我做到聲都沙埋。（傾巡迴演出？）呢啲交畀佢哋，唔想分心，有機會出埠梗係好。」謝君豪則表示知道有新加坡、台灣及內地等觀眾前來捧場，令他相當感動。
文：影視組