姜氏兄妹 搏命捱出頭
音樂組合「Benji & Lesley」姜文杰（Benji）、姜麗文（Lesley）兄妹倆於樂壇浮沉多年，早前決定到內地博一博，參加人氣節目《我不是明星》，結果一炮而紅，微博粉絲人數直線上升，成功背後當然要付出，兩人為錄好節目瞓身力搏，姜麗文在零安全措施下吊上廿呎高大跳綢緞舞搵命博，姜文杰唱歌唱到從兩米高台躍下再繼續唱，出盡渾身解數為博觀眾關注，成功非僥倖！而一班圈中藝人陳奕迅、謝霆鋒、劉嘉玲亦分別打電話、錄短片為二人打氣，父親秦沛在深圳拍劇都特登飛去杭州支持，令兩兄妹感動不已！
Benji：姜文杰
Lesley：姜麗文
Lesley：我最喜歡唱Lady GaGa《Telephone》嗰集。
Benji：你跳綢緞舞跳到好似表演雜技。
Lesley：係呀，雖然以前都有練開跳舞、體操，但嗰日得一個鐘頭去練，仲要排舞，真係都幾有難度。
Benji：望住妹妹吊上十幾廿呎高，仲要零安全措施，佢又第一次跳，萬一失手，就會頭落地，作為哥哥一定好緊張。
Lesley：我就一啲都唔緊張，但聽到後面哥哥猛話小心啲呀！冇自信就唔好做，好緊張。
Benji：因為冇自信真係好容易失手，不過，妹妹嘅表演真係令我好驕傲，請問姜麗文小姐，你幾耐冇拉筋呢？綵排嘅時候，你好似做唔到一字馬呢個動作，但出節目時又做到喎！
Lesley：係呀，綵排時我真係做唔到凌空一字馬呢個動作，點知錄節目嗰陣，唔知係咪因為好high，將自己潛能發揮到最盡，結果拉到，完全唔覺痛，不過，表演完落台，足足三日行路都痛。
視舞台為紅館
Benji：其實都好多謝呢個節目，原本「Benji & Lesley」要分開喇，始終獨立音樂係好難做，我哋諗住上內地享受一下個舞台就解散，幸好又慢慢過關，而每一集都要有突破，我哋四年前發展，目標喺紅館開演唱會，呢十二集節目等於我哋將紅館嘅表演化成咗十二集節目，好有意思。
Lesley：我講咗最喜歡邊一集，你呢？
Benji：有一集我哋一路表演沙畫一路唱歌都幾特別，同埋有一集我喺兩米高台躍下來唱歌都幾難忘。
【親友輪住撐】
Lesley：爸爸真係好支持我哋，我最感動係爸爸喺深圳拍劇好忙，都特登飛過嚟上節目支持我哋，當晚好enjoy、好溫暖！一路以嚟，我哋做乜嘢爸爸都好支持。
Benji：但亦都明白佢入行辛苦咗幾十年，會覺得讀到大學有個學位，但走去做獨立音樂，係一條難行嘅路，當然冇咁支持，我2010年入行，之後幾乎日日都同佢嗌交。記得當年「Benji & Lesley」以獨立音樂組合攞到「勁歌金曲最受歡迎組合銅獎」，攞獎嗰晚我哋諗住用自己嘅故事去勉勵年輕人，只要肯堅持，唔需要唱片公司都可以做到成績，點知我哋上台嗰陣，攝錄機影住秦沛，當時我好大感受，一方面好開心父親能夠分享我哋嘅喜悅，但另一方面，觀眾一見到秦沛，大部分就會覺得：「哦，原來係秦沛對仔女」，有啲人仲喺我哋面前咁講，完全抹殺咗我嘅努力。我哋好努力做好每件事，之後逐間電台去派碟、去鞠躬，或許呢個就係星二代嘅魔咒。雖然係咁，但爸爸對我哋嘅支持，我哋好開心同感動，記得讀大學嘅時候，爸爸喺床頭寫咗「永不言敗，絕不放棄，努力爭取，積極向上。」永遠都會係我做人做事嘅宗旨。
陳奕迅畀驚喜
記：除咗爸爸之外，好似陳奕迅、謝霆鋒、張家輝以及劉嘉玲都好支持你哋喎！
Lesley：係呀，Eason（陳奕迅）喺Eric Kwok嘅演唱會出場前打嚟支持我哋，畀驚喜我哋，真係好nice！仲有嘉玲姐同埋霆鋒，佢哋都好好，特登錄咗短片嚟鼓勵我哋。
Benji：當然好多謝佢哋啦！霆鋒同我哋一樣係星二代，明白星二代嘅苦況，我哋好細個已經識，佢大我只不過兩個月，出世時大家瞓同一張床，但性格好唔同，佢好細個已經好有活力、好有自信，整定入呢行，今次睇到霆鋒條短片，都幾有感受。至於嘉玲姐，佢好有型咁同我哋打氣，佢當年係爸爸嘅麻雀腳嚟。
【為妹妹驕傲】
內地節目《我不是明星》每季都會請來一批星二代表演自己強項作比賽，以淘汰制選出最強，今年「Benji & Lesley」獲邀，兄妹倆邊表演邊唱歌，他們覺得邊集最成功？
文：影視組
服裝：Snidel
髮型：Dickson Tang@Hair Corner
場地：Table 18@apm、apm商場