嘉欣老公嫌煩 宣布封肚
靚靚媽咪李嘉欣為老公許晉亨誕下兒子Jayden後專心湊仔，昨日她受訪時坦言無意為囝囝再添弟妹，全因老公曾說：「仲未夠煩？」難怪她揚言封肚，將全副心機放在Jayden身上。
李嘉欣昨日與好姊妹吳君如接受汪明荃主持節目《女皇的盛宴》訪問，未錄影前，兩女明言「百無禁忌」、無所不談。提到前日陳茵媺宣布再度懷孕，嘉欣戥對方開心。問她會否想再生B？她笑謂：「都有同老公提過，佢問我：『仲未夠煩？』所以係刻意唔想（再生）。呢樣嘢最辛苦係女人，既然唔鼓勵就唔諗喇。（囝囝想有細佬妹？）有時我飽得滯，佢都問我係咪有BB。」
君如賣關子
吳君如透露現正忙於籌拍賀歲片《金鴨》，笑稱今次卡士會國際化，但暫時未能透露詳情。問到陳可辛會否客串？她笑謂：「我之前去台灣夜店搜集資料，老闆造型同陳可辛一模一樣，佢行出去之後我同工作人員足足笑咗5分鐘。（今次拍得好急喎。）上年上咗畫都繼續拍緊，似足香港精神，或者加埋炒手機情節實行跟足潮流。」
汪明荃則透露老公羅家英未來工作排山倒海，但她不會干涉：「咁大個人，佢最清楚自己身體狀況嘛。」
文：影視組