周柏豪邀樂仔睇騷泯恩仇

師弟妹大合唱

柏豪坦言會吸取教訓，調節好身體以最佳狀態迎接演唱會：「教練同我講呢幾個月時間表令我嘅儲備冇晒，事實上我又戒咗好多甜、油同一啲高脂肪嘅嘢，工作量同運動量又大，output多input少，所以一下熄機乜都冇晒。呢個係一個小警號話畀我聽演唱會前所有嘢唔好去到咁盡，要畀自己休息，唔止身體上休息，心理上都好緊要。」

提到演唱會嘉賓，柏豪透露會以大師兄身份，邀請中學百多位師弟妹上台大合唱，更以貴賓式招待他們：「希望到時唔好餓親、凍親佢哋，因為咁多人一定會有好多嘢忽略咗。」

柏豪謂會邀被傳決裂的余文樂（右）到場打氣。（資料圖片）

早前練到虛脫的柏豪，現在會調節好身體以最好狀態迎接演唱會。

愛傾籃球波鞋

提到余文樂在柏豪上次的九展騷以神秘嘉賓身份上台合唱，如今盛傳兩人兄弟情不再，問柏豪會否再邀請「昔日」好兄弟？他說：「我會叫佢嚟睇，知佢拍緊戲，但希望佢會嚟睇演唱會。（反面？）你哋一廂情願啫，大家都唔回應咪變咗咁。咩都好啦，因為大家有同樣taste先可以做朋友嘛，唔好成日講到我狙擊佢，又話我哋決裂，大家喺電話group入面都會傾吓偈，傾吓籃球、車、波鞋。」

文：音樂組

髮型：Cliff Chan@hair corner

化妝：Kris