家輝恨孖發哥 揸槍做英雄

神級影帝周潤發與張家輝前日在港拍攝王晶新片,家輝自爆當年曾到《喋血雙雄》拍攝現場,被發哥的氣場懾服而腳仔軟!難得今次有機會合作,家輝即向發哥挑機,希望兩人可再度拍住上,揸槍拍英雄片!

巨星周潤發前日與影帝張家輝到元朗嘉龍片場拍攝由劉偉強監製、王晶執導的賀歲片《賭城風雲2》,同場尚有余文樂、文凱玲(Connie)及內地女星童菲等。前日劇情講述飾演國際刑警的Connie和樂仔,護送由泰國返港的家輝到發哥的豪宅。拍攝期間,發嫂與樂仔掏腰包請台前幕後食糖水及漢堡包,氣氛熱鬧。

發哥讚星爺好相處

發哥與家輝雖是首度合作,但表現老友,發哥笑言跟家輝對戲是賞心樂事:「可以同『張七帝』(張家輝)學嘢,叨吓佢啲旺氣。」家輝聞言即自爆當年被發哥「嚇到腳軟」:「佢成日講呢啲笑,我見到佢都神魂顛倒!啱啱入行時我跟修哥(李修賢)探《喋血雙雄》班,一見到發哥我就腳軟,今次同佢拍戲係個好好機會,發哥鏡頭前後都好照顧大家。」問到會否想跟發哥拍動作片?家輝即high爆說:「想呀!再拍《喋血雙雄》!發哥揸槍嘅魅力有邊個忘記得到?」

發哥表示今集拍得比上集更過癮,並透露已在泰國跟劉嘉玲拍咀嘴戲,他笑說:「發嫂都在場,但我哋唔會尷尬,都係專業演員。」提到周星馳再被批評品格,曾與星爺在無綫合作拍劇的發哥說:「我哋冇喺電影合作過,但我好鍾意佢嘅電影,覺得佢好有才華。佢哋之間發生咩事就唔清楚,後期性格變成點我唔知,不過訓練班時大家嘻嘻哈哈,為人都好相處。」

兩女爭樂仔享艷福

樂仔則笑言多得晶哥令他「艷福不淺」,周旋於Connie及童菲之間,但就沒有叫晶哥加親熱戲。Connie戲內慘被「蠱惑樓梯」跣倒,獲樂仔攬腰救美,問到與發哥合作的感覺,她說:「好nice又親切,自拍角度影得好靚。(今次要性感?)唔使,晶哥想我試吓喜劇路線。」另外,今集發哥的大宅以Cyber感為主,並充滿機關,裝修豪華樓底甚高,晶哥透露豪擲500萬元,用了一個月時間搭景。

文:影視組