周秀娜最憎嫖客寧愛花心男
「宅男女神」周秀娜與舊愛陳偉成分手後，感情一直未有着落，未知是否因為花心前度陰影所致，娜姐坦言男人天性就是如此，而明年將踏入女人30的她，又謂不心急拍拖，一個人也很快樂！
昨日「宅男女神」周秀娜與歌手麥浚龍一同出席Timberland秋冬時裝活動，穿上一身秋冬服飾的娜姐表示最愛買鞋，更自爆很長情，試過一對鞋子穿至爛鞋底才扔掉。她又表示將會開拍賀歲片，片中要一人分飾六角，笑指現時精神分裂：「我返到屋企見到阿媽先知自己係邊個？（平時有冇練習？）都有，所以嚇親身邊朋友同同事。」
男人天性唔專一
對於有指舊愛陳偉成翻撻o靚模女友尹蓁晞？那前度豈不也精神分裂？她說：「我係開心嘅分裂，佢就好耐冇聯絡，已經完結，我依家重新投入自己生活。（幾時重新投入感情生活？）冇得夾硬搵，（出年30歲唔心急？）唔會喎，我依家自己一個都幾開心！（擇偶條件要專一？）我唔會諗專一，男人係咁，呢啲係天性！（如果男友嫖妓呢？）我自己就唔能夠接受，因為關乎尊重與信任。」
麥浚龍自編自導
而麥浚龍就透露即將開拍新電影，自己會做導演及編劇，又會沿用首部電影《殭屍》的演員：「已經預留咗個好重要嘅角色畀鮑姐（鮑起靜），仲有陳友，不過佢係做監製。」他謂近日因寫劇本而令膊頭勞損，每隔20分鐘就會像火燒痛，問到女友可有為他按摩？他笑言女友也十分忙：「冇喎，我日日都痛，（日日按囉？）我用冰敷降溫，而且佢都好忙。」
文：名人組