官恩娜哭訴面癱

官恩娜（Ella）昨日出席時裝品牌Max & Co.概念店開幕活動時，一臉愁眉苦臉，似是在強忍淚水，當記者問到她是否不開心和有心事，她終不禁落淚說：「我右邊面郁唔到，眨唔到眼，睇左腦科。I am ok，因為啲閃光燈閃得好勁，同埋眨唔到眼，所以流眼水。（點治療？）接受緊高劑量既類固醇，我食好高劑量嘅類固醇，超出我體重應該食嘅劑量，食到塊面腫晒。初時以為中風，好驚。（點發現？）上星期有日我瞓醒起身飲水，啖水含唔住漏出嚟，去睇腦科，話係第七條神經線受感染，右邊臉郁唔到。之前無咁勁，依家要用人工眼水，好尷尬，人哋新店開幕我笑唔到。」

薛凱琪頻進補

Ella坦言對病情感到很擔心，她說：「唔知點解突然郁唔到，醫生叫我抖吓，問我係咪休息唔夠。可能我之前感冒發燒。（要幾耐先好番？）醫生話有啲人一個月會郁得番，三至六個月就會好番。（做咩唔休假？）一早接咗啲Job會繼續做。男朋友都有陪我覆診，要不停睇腦科。我瞓覺要黐手術膠紙，隻眼瞌唔埋，男友都有嚟我度照顧我。雖然呢個唔係話會致命嘅問題，但做呢行我靠塊面搵食，郁唔到好得人驚，好黐線。（痛唔痛？）都痛，因為要好用力郁會扯到個頭啲肌肉好痛。要盡量Keep住個樣，如果唔係驚影相會好肉酸。再加上呢排屋企又發生咗啲事，心情好忐忑。」

同場的薛凱琪就表示工作忙得沒有假放，被問到身體可會吃不消，她說：「有某啲病一路有睇緊醫生，腰骨、關節同埋身體私人啲嘅病，不過無乜大礙。要食多啲補品補吓。公司唔畀我放假，忙到好瘋癲，不過都好感恩公司畀我做咁多音樂，惟有放多啲錢係補品上，食多啲冬蟲草。」

文：名人組