霆鋒飛機餐 升空無望
謝霆鋒繼玩轉水舞間後，今次由水底轉戰空中，親自炮製超豪飛機餐，引來靚女空姐爭住服侍這位星級貴賓。可是經專業大廚品嘗後，雖然大讚味道一流，但作為飛機餐卻不合格，令霆鋒慘食「檸檬」。
謝霆鋒為拍攝內地飲食節目《十二道鋒味》，可謂玩勻海陸空，繼早前深入《水舞間》水底舞台後，今次挑戰在高空三千尺專享的飛機餐，獲航空公司的邀請，到製作飛機餐的廚房參觀。
見炒飯機大開眼界
為了確保衞生，中菜廚師主管關師傅與霆鋒在進入廚房前，都穿好防護衣物和戴上口罩，到水果房、麵包房等參觀，霆鋒於熱食房見到每部炒三公斤飯的炒飯機，及每日煎上萬份奄列的自動煎蛋機，不禁笑言：「真係好似入咗個巨人國咁，大開眼界！」他亦「技癢」即席試煮XO醬炒帶子，獲關師傅大讚有姿勢、有實際。
聽取意見後，霆鋒開始認真鑽研一道美味的飛機餐，他說：「因為我工作好忙，經常要坐飛機去各地做嘢，很多時三餐就係喺飛機上食，所以對飛機餐嘅味道好有要求。」最後他成功炮製一道黑松露飯及西班牙凍湯的超豪飛機餐，並邀請經理人霍汶希（Mani）及關師傅到模擬機艙試菜。難得型男駕臨，空姐們亦親身示範在航機上準備飛機餐，及將食物二次加熱。
關師傅品嘗過霆鋒的手勢後，有讚有彈，他力讚霆鋒的廚藝精湛，菜式美味得無可挑剔：「但唔可以作為空中餐，因為凍湯溫度問題好容易孳生細菌，而黑松露又會超出公司成本預算。」被點醒的霆鋒笑說終於明白一道飛機餐背後是要落足心機。
文：音樂組