張智霖luck魔派運
人人都想發達，今晚「1.5億」富翁將會誕生，曾「開口中」的張智霖，實行將cool魔升格luck魔，越洋揀了六個心水靚冧巴給本報讀者，希望為大家帶來好運，而英皇三嬌「龍虎豹」都想發億元財，蔡卓妍誓言要刀仔鋸大樹。
全城瘋狂的一億五千萬元六合彩彩池，大家開口埋口都希望會發達，身在英國拍攝《衝上雲霄》電影版的張智霖（Chilam），之前「世界盃」因為開口中，帶挈身邊友人買中波膽贏大錢，今次Chilam再醒六個冧巴給本報讀者，大家不妨參考，或碰個運氣。
英外景隨手執冧巴
正在英國與台灣女星郭采潔趕拍《衝》片的Chilam，對全城掀起的六合彩億元夢，他都有所關注，他更忽發奇想，在拍攝現場隨手影了兩張數字相，他說：「有1、8、16、24、32及40，祝君好運，如果香港巿民都跟我呢六個冧巴買又中咗，咪皆大歡喜，到時請我食飯呀。」Chilam表示也會湊熱鬧，越洋買一注碰碰運氣，他笑說：「睇吓幸唔幸運。」
阿Sa照煲11、12
自封英皇「龍虎豹」的容祖兒、蔡卓妍（Sa）、鍾欣潼（阿嬌）也希望中億元夢，阿Sa坦言上期有億元彩金，她已經有落注，她笑說：「上次都有鋸吓㗎，我貼咗自己心水冧巴，就係生日日期11同12，但係冇中到，我會再接再厲刀仔鋸大樹，誓要鋸到為止，照樣買番嗰兩個冧巴，如果中咗先做善事，其他再作打算。」
阿嬌同樣上期已經有幫襯，她說：「媽咪幫我買，買咗10張飛，分咗5張畀我，但竟然一個字都冇中，我會叫媽咪繼續幫我買，中咗第一時間做善事，反而冇諗過要點使，因為覺得好渺茫。」祖兒的心水冧巴是「6」字，她說：「所有6字都買，如果真係畀我中咗，做善事幫助有需要嘅人，之後有諗過重新裝修自己間屋。」
文：音樂組