Ashina強攻影圈有運行

不少藝人篤信風水命理，早前推出寫真集的郭奕芯（Ashina）也不例外，曾與盛品儒傳緋聞的她隨着知名度與日俱增，工作量也接踵而來，深信風水的Ashina日前相約奇門遁甲風水師雲文子贈番兩句，在事業和愛情上指點迷津。只得18歲的Ashina原來熱愛演戲，尤其愛睇周星馳笑片，她更自爆其實有參選《美人魚》海選，但最後未有打入40強，雲文子聽罷叫她不要灰心，更指批過Ashina未來一年運程，指她在娛圈有得「發圍」！

易陷三角戀

雲文子表示Ashina為人其實很單純，但不代表「冇腦」，只是內在潛能有待發揮，她說：「佢有小聰明，不過佢命格唔算一夜爆紅嗰種，只係有潛力，今年11月之後有更多工作機會，同埋新聞方面更多noise，身邊會出現一位好有文化嘅貴人幫助。」Ashina聽罷即「問題少女」上身，直言會繼續努力工作，希望有一天達成當演員的目標。

「嫩版謝安琪」Ashina熱愛演戲，現正努力裝備自己，希望在影圈有一番作為。

桃花運旺盛的Ashina，早前與盛品儒夜遊傳緋聞。（資料圖片）

其後Ashina主動自爆目前單身，問師傅她的愛情運，怎料師傅指她身邊有很多男性朋友追她，不過大部分都是有女朋友或老婆，勸她小心陷入三角戀，Ashina說：「自己會小心，因為唔好睇我好似平時鍾意玩，其實我對愛情都好專一同認真，所以我都唔想受傷，會小心揀男朋友。」

化妝及髮型：MTmakeup

文：專案組　

攝：張福宏