陳敏之開餅店送祝福

藝人陳敏之雖然在《使徒行者》化身幹練廉署調查員，情路卻甚為坎坷，她說：「戲裏面好多感情戲，好淒美，有少少韓劇feel，好似《藍色生死戀》咁！」她與沈震軒的感情線更是重頭戲，當中有場火海英雄救美的場面，亦是敏之首次拍火災戲，她說：「我feel到我個contact lens都差啲融，又感覺到皮膚好，原來喺火場係好無助。（男友有冇擔心？）佢有叫我小心啲，不過都知我好熟拍嘢，唔會點擔心。」

想搵人仔

敏之與沈震軒劇中有激咀戲，問是否如早前報道般錫到甩皮？她笑說：「拍嘅時候好投入都冇呢啲感覺。（交換口水？）分唔到呢啲嘢，cut機後一啲都唔尷尬，反而roll機前就有。」

陳敏之、沈震軒在劇中激嘴，專業投入並不尷尬。

有意北上拍劇的陳敏之，重心始終會放在香港。

同劇的林峯和佘詩曼密密搵人仔，令她也萌生北上拍劇之念，不過，敏之始終會以香港為基地：「就算拍都會兼顧兩邊，唔會集中喺大陸。」

諗頭多多

不過諗頭多籮籮的敏之近年陸續達成理想，愛唱歌的她來年推出專輯：「今年都實現做老闆開曲奇餅舖嘅夢想。（獨資？）做股東啫，同有心嘅朋友夾份搞。」她想透過賣曲奇送上祝福，充滿正能量之餘更好有心思！追問婚期，她保持一貫作風說計劃中：「呢個一定會做嘅，結婚始終係女仔嘅夢想。」

文：影視組