姚子羚拍劇冇停手 預告撞車

藝人姚子羚最近在將軍澳電視城拍攝無綫新劇《四個女仔三個BAR》，她表示正在拍攝和曾航生的感情戲份，而此劇拍攝又即將完成，只剩下其撞車戲，之後她就會開始另外一套劇集《張保仔》的拍攝：「我冇咩外景，因為我嘅角色主要喺皇宮度同心姐（謝雪心）、陳展鵬佢哋勾心鬥角。（同前輩演對手戲壓力大？）咁又冇，大家都係想演好角色啫。」子羚又說中秋節雖然無暇和朋友慶祝，但都有向朋友送出親自製作的月餅以表心意。提到其主演劇集《我們的天空》引起爭議，她就說：「我相信最大爭議都喺《同根生》嗰集啫，我相信每個地方總有好識包容同冇咁包容嘅人，唔可以一概而論。」