苗僑偉入廚房 鋸扒天倫樂
型男苗僑偉在劇集《使徒行者》中指揮一班臥底警員，更英雄救美帶江美儀脫離險境，破格演住家男人柔情一面，冧倒一班女粉絲！現實中三哥只求過得簡單，生活重心則放在家人身上，甚至為他們下廚。
苗僑偉（三哥）在劇集《使徒行者》中演刑事情報科（CIB）總督察卓Sir，他指監製文偉鴻在取材上做足功課，題材令他大開眼界：「同以前做刑警好唔同，原來警隊情報科咁重要，要竊聽、負責臥底，連辦公室都唔喺總部。」提到不少觀眾認為他是黑警，他笑言：「咁表示劇情真係好有張力，相信觀眾好快會有新發現。」
三哥大讚同劇的林峯和佘詩曼演技有突破：「佘詩曼戲裏戲外都古靈精怪，同林峯喺槍戰戲合作印象最深刻。」而與江美儀的一段情，他坦言是最沉重的部分：「段關係好微妙，好似係我好多事咁，慢慢發現自己鍾意咗呢個女人。」三哥更在劇中展現活潑一面，不惜扮臥底披上圍裙教煮菜接近美儀，大晒好男人形象冧倒不少女粉絲！問到有否下廚氹三嫂戚美珍？三哥笑言：「以前有，依家有機會一家大細都煮吓。（拿手菜式？）煎吓牛扒配紅酒、煎蛋嗰啲簡單菜式。」
子女出身 多陪老婆
提到一對仔女已開展獨立生活，問到三哥是否準備「甩身」？他分享指：「多咗時間陪三嫂，同埋有時間應酬班波友，屋企行民主，有嘢會一家人齊齊決定。（子女入娛樂圈？）未提過，可以提點吓佢哋，最緊要係想做啲乜。」
文：影視組