傅嘉莉晒冷落注 糖妹刀仔鋸大樹
香港史上最強六合彩「1.5億橫財夢」將於明晚攪珠，距離「超級幸運兒」的誕生不足48小時，大家都把握時間湧到投注站買個「億元夢」，昨日潮模傅嘉莉（Kelly）和糖妹黃山怡亦不甘後人，Kelly「晒冷」落重注，糖妹則「刀仔鋸大樹」20蚊博做億元財主。
明晚的1.5億元六合彩，近日已成為全港市民茶餘飯後的熱話，連日來投注站人頭湧湧，買六合彩的人龍排到出門口，藝人歌手亦把握機會盼能成為億元富豪！
烏龍落注
潮模Kelly也被巨額獎金吸引，昨日趁熱鬧到投注站測試運氣，她說：「我買六合彩嘅次數三隻手指數得晒，試過同屋企人夾份買過，今次係人生第一次買八個字嘅六合彩飛。（買咗幾多錢？）總共買咗$340蚊，用晒銀包啲錢啦，好進取。」Kelly買飛過程烏烏龍龍，除填錯飛外，幾錢買一注、要買多少個號碼都矇查查。講到心水號碼，她說：「因為我生日係6號，細佬生日係16號，所以6係我嘅幸運數字，係必買號碼，而8、18有發嘅意思，都係必選no.。」
Kelly坦言不貪心，不一定要頭獎，三獎都可以，之前她發生交通意外大難不死，信相必有後福。若然成為「億元得主」，Kelly會用一半獎金做慈善用途，然後買樓給家人，部分會則作投資，又會成立一個關於小朋友同老人的基金，幫助罕見疾病人士。
收集運氣
至於糖妹則實行「刀仔鋸大樹」，昨日她在尖沙咀投注站用20蚊博1.5億獎金，因投注站內的人龍幾近排出門口，糖妹初次試用自動售票機落注買飛。
講到心中號碼，糖妹說：「老闆好有六合彩運，所以都問咗佢幾個號碼，仲收集埋其他同事嘅lucky no.，加上呢幾年自己都幾旺，都算腳頭好，我運氣都應該唔錯o架！」若億元橫財夢成真，糖妹稱會捐一半做慈善，餘下會用來實現音樂夢，舉行巡迴演唱會。
文：音樂組