陳美齡叫學生放膽問 歡迎挑戰

長居日本的息影女星陳美齡,近日回港為浸會大學授課。出身藝人的她不擔心被人質疑教學資格,自揭講課資歷遠至日本及美國。雖然要港日兩邊走,但Agnes認為香港學生學習態度極佳,令她很有滿足感。

陳美齡(Agnes)日前首次在港授課,她說:「我喺日本教書好多年,教香港學生係第一次。感覺香港學生好有心機聽書,反應好好,我教都教得好有滿足感。我9月、11月同出年2月都會講課,雖然要香港、日本兩邊走,但都好值得,唔嫌辛苦。(有冇人質疑你嘅授課資格?)冇喎,我主要向傳理系學生講課。我喺日本教書好多年,喺美國史丹福大學畢業,又出咗60本書,應該都可以有資格分享我嘅經驗。」

問到港日學生有何分別?Agnes說:「香港學生我只教咗一堂,唔作得準,但我感覺現今日本學生分兩種:積極同唔積極。我都喺美國講過書,美國學生就唔怕醜、唔怕錯,點都講咗先,有啲仲係是但講一句出嚟都好有深度。其實放膽講,話唔定會出現非常好嘅意見!」

鼓勵日本婦女自強

Agnes正是放膽表達意見的先行者,80年代她在日本帶同長子到職場工作,飽受批評。她說:「當年我帶埋BB返工,邊工作邊湊仔,挑戰咗日本女性結婚、生仔後仍積極工作嘅傳統,引發咗『美齡論爭』,我一直從未正式發言。最近我出版咗最新著作,就係藉呢件事探討日本近年女性地位,我發現同當年『美齡論爭』相比,根本冇乜改進。女性年過30,加薪幅度遠不如男性,生咗三個小朋友而仍然外出工作嘅比率,更低至百分之五。日本婦女被視為只有結婚、生仔,至係對社會有貢獻,係好侮辱性!我希望透過我嘅著作,鼓勵日本婦女自強。」

文:影視組 

攝:司徒國榮