朱主席涉非禮案老蘭被捕
人稱「朱主席」的朱壽仁早前被龍小菌的經理人邵子風，指他涉嫌非禮一名台灣女子並陪同對方到警署報案，昨日傍晚朱主席無懼指控兼風騷受訪，否認被通緝，不料劇情急轉直下，邵子風帶同警員「踩場」，將他拘捕並帶回警署，而邵子風更「歡送」對方登上警車。
朱主席在傍晚六時現身中環蘭桂坊，出席由大學生所主辦的活動，大方接受傳媒訪問，對於被指控非禮一事，他說：「我交咗畀律師處理，無咁嘅事，唔好生草藥噏得就噏。」又稱自己無愧於心，又炮轟邵子風的網台並非正式電視台：「佢哋講嘢唔會多方面求證，淨係識翻炒舊料，總之公道自在人心。」
就在朱主席大呼無辜後不到十五分鐘，邵子風現身「踩場」向他大叫：「朱主席，你唔驚畀人拉咩？」朱主席即時「還拖」表示：「我都費事理你。」隨即向工作人員表示：「佢都唔係受邀請，帶佢出去啦！」而被帶離場的邵子風直斥對方欠他四百多元。
三度被要求查身份證
事隔五分鐘，便有四名軍裝警員到場，並向朱主席索取身份證，起初朱主席態度極不合作，先向警員表示：「你行開少少，我擔心安全有威脅，我要Call律師。」隨即不停打電話，期間一名警長向朱主席表示：「有人向我哋報警，話呢度有一名被通緝人士同一單觀塘嘅Case有關。」擾攘一輪後的他更表示：「可唔可能返差館先睇身份證？」但被警長斷言拒絕，於三度要求下才出示身份證。其後警長表示：「依家要正式拘捕你，因為你涉同一單非禮案有關，你明唔明白？」朱主席更直言唔明白。警長因而加強語氣表示：「總之如果你唔合作反抗，令自己或其他人受傷我就會用手銬。」
債主到現場追數不果
結果垂頭喪氣的朱主席在警員一左一右陪同下登上警車。而邵子風一直留守門口，見到朱主席更拿起手機自拍，又高興得不停對他揮手說：「拜拜啦朱主席！」事後邵子風直言自己是報警者，又表示據他所知朱主席最少因涉及兩單案件而被通緝，又將早前報警的落案紙給傳媒拍照，認真熱心。另「蜥蜴仔」曾德華原打算到現場追討朱主席欠款，去到才發現對方已被捕，最後到警署搵朱主席追數。
而據警方發言人表示，昨日下午六時四十五分，警方在中區拘捕一名姓朱的四十五歲男子，該男子涉嫌與八月二十四日一宗非禮案有關，現正被扣查。
文：音樂組