苗僑偉曳曳借醉喪咀仔
藝人苗僑偉（三哥）昨日以代言人身份，出席「威利來進駐百佳超級市場」發布會，即席送上親筆簽名酒予百佳超級市場採購經理梁靜淑。自言怕醉的三哥表示，平日飲酒會點到即止，喜歡少許High的感覺，對上一次斷片則是於去年太太戚美珍的生日派對上，他更大爆「借醉行兇」的趣事：「我醉咗最多瞓覺，之後冇晒記憶，後來睇番相先知，我周圍捉啲男人咀，好在我酒醉三分醒，唔係攬住女人咀就大件事！」
老友愛劈酒
提到其老友們均愛劈酒，三哥笑稱他們身上掛有「勇」字，又認為一班朋友淺嘗美酒便最好：「其實曾志偉唔鍾意飲酒，佢唔係品嘗，係狂劈，佢啲對手隊到佢瞓低先收手，我就鍾意品嘗白蘭地。」
度完假還債
早前一家四口外遊返港的他笑言，享受陽光與球場以至皮膚曬黑，返港後要即刻「還債」，為無綫劇《使徒行者》做宣傳。三哥又透露劇中與江美儀有蜻蜓點水式吻戲，更嘲笑同劇的陳敏之和沈震軒咀到甩皮。
文：影視組