祖兒：肥膏唔識走上胸
【羅宛君澳門直擊】天后容祖兒昨日到澳門出席音樂會記招，曾以fit爆look上台勁歌熱舞的祖兒坦言今年以「密實」造型亮相，全因近排工作太忙未有時間操肌，祖兒被取笑再操上圍會慘變「飛機場」，她竟抵死自嘲：「肥膏唔識走上胸。」
容祖兒昨日以師姐身份率領鍾欣潼、鍾舒漫、泳兒及許靖韻出席澳門下月1日舉行的音樂會記者會，祖兒被司儀問到會否以sexy造型登場？今年第四年參與音樂會的祖兒說：「唔會，因為去唔番最fit嘅標準，會密實啲。」她解釋近日工作太多冇時間做運動慘變「肥妹仔」：「好想做運動。（夜晚運動？）係帶氧運動，跑步同做sit up。（再減冇上圍？）不嬲都冇，啲肥膏唔識走上個胸度。」
對於港姐不是其心水，身為港姐星級評判的祖兒說：「公投會更加有民眾意願。」
唔興拍裸照
近日有多位荷里活當紅女星被黑客入侵雲端而爆出「閃卡」潮，祖兒表示所有照片只會存放在外置記憶硬碟：「近日個hard disk壞咗，搵咗個有商業罪案調查科咁專業嘅朋友嚟我屋企整咗三日，好彩救得番。（有冇裸照？）唔興玩呢啲，『小不點』有乜好睇？（情趣？）唔係我杯茶。」
阿嬌冇嘢驚
曾捲入「不雅照」的阿嬌大方回應荷里活女星私密裸照「曝光」，她說：「呢啲嘢好私人，大家偷睇完反而鬧人哋，好唔啱，人哋唔係自願公開畀人睇。」她直認有用雲端，並說唔驚：「都冇乜嘢，係同朋友合照、風景同雲相。」鍾舒漫則坦言沒有與男友吳浩康影「慾照」，泳兒說如有人要求她拍「慾照」必定拒絕，至於許靖韻透露有不少自拍照，為免在街外沖曬時被人指她「自戀」，決定買部迷你曬相機自行曬相。
文：音樂組