阿佘玩色誘 林峯O嘴

佘詩曼在無綫新劇《使徒行者》中盡顯蠱惑演技,貪錢成性的她為從林峯手上贏錢,最終除剩小背心大玩「色誘」,但平平身材卻令阿峯失望到呆一呆;而沈震軒為完成任務,化身「中環狼人」,與比堅尼女左擁右抱!

佘詩曼在新劇《使徒行者》中與林峯繼續鬥戲,二人拍攝一場賭錢剝衫戲時大玩「爆肚」,兩人互不相讓,林峯更寸窒阿佘,場面搞笑。今個星期劇情講述個性機靈的阿佘落重本與阿峯賭錢,輸得血本無歸的她以除衫作賭本,向阿峯發動色誘攻勢,結果輸到剝剩小背心絕地反擊,更自稱出動「航『胸』母艦」,但阿峯卻覺得貨不對辦,O晒嘴,阿佘擔心被睇蝕惟有雙手掩胸,整場戲曖昧又搞笑!

沈震軒攬女「硬晒」

另一方面,沈震軒為求完成臥底任務化身「中環狼人」,在劇中的前女友陳敏之面前左擁右抱刺激對方。沈震軒拍攝與三點式女擁抱戲時右手剛做完手術,監製文偉鴻笑言:「拍時佢『硬晒』,不過係隻右手!因為都唔係好郁到,本來有場戲要佢掟女仔落水,我哋都為佢準備替身。」沈震軒受訪時亦笑言:「係隻右手硬晒咋!(頂硬上?)因為右手真係用唔到力。班女仔係訓練班新人,佢哋都好尷尬!自己好期待呢場戲,因為交代到個角色嘅使命感,喺最愛嘅人面前都不惜傷害佢嚟完成任務。」

至於苗僑偉(三哥)將與江美儀展開感情線,執行竊聽任務的他無意中得知江美儀慘遭家暴,暗中掩飾身份保護對方。

文:影視組