鍾鎮濤（阿B）和范姜終昨日在一眾圈中好友和家人的見證下拉埋天窗，一對新人於下午一時半行禮。完成儀式後，東網記者即時直擊阿B的死黨兼證婚人譚詠麟，問他覺得婚禮中最令人感動的一刻？阿倫說：「戴戒指、講誓言時真係好感動！」至於兩位主角有否感動落淚？他謂：「有，但嘉賓先落淚過佢哋，成班朋友都知佢哋唔容易，有情人終成眷屬，好戥佢哋開心。」
新郎哥阿B在眾兄弟團哼着歌聲襯托下，以一身白馬王子Look兼戴反光黑超現身，心情靚絕兼大晒婚戒。笑到四萬咁口的阿B說：「多謝大家咁遠嚟我嘅婚禮，好開心，我嘅朋友，所有人都多謝。」在旁的阿倫幫口：「仲有世界各地嘅歌迷。」曾志偉亦稱：「我諗呢度個個都戥B哥哥開心，大家都為B哥哥流咗開心嘅眼淚。」阿B再補充：「今日好開心見到咁多人喺度，我哋影咗好多靚相，會同大家分享。」愛搞笑的志偉此時再插嘴：「以前鍾意過你啲女，就唔好嚟啦！」阿B笑着還擊：「唔使搵我，搵志偉啦，佢逆來順受。」逗得眾人哈哈大笑。阿B坦言有些朋友今次未能出席，誰知志偉竟稱：「下次結婚囉！」阿B再度「還拖」：「咁下次再講，Thank You。」