CL@2NE1撈過界 出自家fashion

韓國人氣女子組合2NE1隊長CL向來以打扮時尚見稱，不但成為年輕人的追捧對象，更獲各大時尚品牌垂青，邀請她到各地出席時裝騷及時裝活動，CL不僅是炙手可熱的歌手，亦是大家爭相模仿的fashion icon。

Jeremy Scott成密友

CL早前專誠來港出席品牌Marc by Marc Jacobs活動，並與品牌設計總監Katie Hillier初次會面，二人一見如故，並互相交流時裝經。CL最欣賞品牌今季日式忍者風的粗腰帶造型，以及紐約街頭風的紅色格仔服飾，易襯又時髦。CL笑言自己由10、11歲開始已很喜歡逛街買衣服，未知是否因為她對時裝的熱愛，故與時裝計設師分外投契，當中美國時裝設計師Jeremy Scott更是她的閨中密友，對方更曾友情客串2NE1的MV，足見關係非淺。

身為時裝迷的CL，10歲起便有逛街買衫的嗜好。

CL與Katie Hillier（左）一見如故，大談時裝經。

與Jeremy結緣，除了因為對方所設計的服飾非常適合舞台表演而增加了合作機會外，更重要是每次CL與對方見面，Jeremy均會細心地安排最平凡、最簡單的節目給她。她說：「我同Jeremy見面多數都喺洛杉磯，因為佢知我平日唔可以過普通人嘅生活，所以佢會帶我去做最平凡嘅事，好似出去行街、食飯，夜晚傾偈傾通宵，總之佢會確保我覺得舒服、悠閒，真係好窩心！」

與老佛爺咀嘴

CL亦與時裝界老佛爺Karl Lagerfeld老友鬼鬼，早前她獲邀出席巴黎時裝騷時，更與老佛爺即場咀嘴，非常熱情。她透露老佛爺先後兩次邀請她出席時裝騷，令她歡喜若狂，可惜第一次因與2NE1的巡迴演唱會撞期，令她痛失機會，當她再次獲邀時，即使工作再繁重，她也定要抽空到巴黎出席此盛事。她說：「其實我嗰日時間好緊迫，我當日先落機，只係得5分鐘時間畀我裝身去睇時裝騷。其實我好想着品牌嘅服飾現身，但係因為唔夠時間準備，最後我只係着自己嘅T恤去。其實我成個過程都好擔心，怕佢覺得我着得唔好，不過Karl竟然同我講『I love your T-shirt!』，我真係覺得好開心！」

揭戴黑超秘密

雖然去時裝騷前非常匆忙，但時裝騷後CL亦抓緊時間瘋狂購物，她笑言：「我今次買咗好多高踭鞋！其實我買嘢唔會理係咩品牌或者幾多錢，最緊要係啱心水。我好鍾意高貴嘅、復古嘅、時尚嘅款式，其實我咩style都鍾意，哈哈！不過我尤其鍾意買外套同埋高踭鞋。」而作為時裝發燒友的她，坦言希望與不同品牌合作，設計出有CL風格的時裝、鞋履，甚至太陽眼鏡，一嘗做設計師的滋味。她說：「我成日都會戴太陽眼鏡，除咗唔想太多人一眼就認得出我之外，最重要都係視乎副太陽眼鏡襯唔襯我一身嘅打扮，最緊要好睇！」

與Rihanna「撞衫」

CL擁有一雙單眼皮的眼睛，每每出場均以粗眼線兼突出的眼妝示人的她，其標誌性的「貓眼妝」，已經引起潮流。坊間有無數博客及化妝短片，專誠分析她的眼妝，讓一眾單眼皮女生化身CL。同時，CL亦被化妝品牌賞識，擔任眼睫毛液、口紅等廣告的女主角，足見她在彩妝界亦有一定地位。

另外，她於舞台上的造型亦時常引起外界關注，由於她與天后Rihanna均非常喜歡Jeremy Scott所設計的服飾，故二人曾多次出現撞衫情況，更引起各地粉絲熱烈討論。

文：龔凱欣

攝：黎志輝