Ana R.打boxing 老公嫌棄

名模Ana R.日前聯同師妹伍靜麗（Angie）及師弟Taner一齊健身，Ana透露Taner擁有健身教練資格，對方是她與Angie的健身教練：「我跟佢學咗一年，因為Taner都係做模特兒，所以佢好清楚我哋想要嘅身形係點，唔可以太排骨，但又唔可以太有肌肉，要有條線美。」

而Angie跟Taner健身兩年，主要鍛煉下半身，尤其想臀部渾圓啲，問她可會練馬甲線？她說：「我都想，但好難練，我同Ana都高，條馬甲線相對會比較長，愈長就愈難，而且女仔腹部要有啲脂肪準備生仔。」

Angie笑言要鍛煉臀部肌肉。

Ana（前）與Angie由Taner做教練操肌。

Ana則以生仔為目標：「我主要練下身、腹肌同背肌，為生BB而做好準備，因為佗BB嘅時候會令背脊好大負擔，我唔想咁易攰，想佗得健康。」Taner從事健身教練兩年，他認為除了健身外，也要配合均衡飲食，Ana笑言經常被對方捉到她偷吃無益食物。

忍唔住笑

問Ana有否與老公Bradley齊齊健身﹖她說﹕「老公鍾意打boxing，Taner對boxing都好有興趣，我跟Taner健身嘅時候，老公就會嚟搵佢。（咁你有冇同老公一齊打boxing﹖）佢唔鍾意我同佢一齊學，因為學嘅時候忍唔住笑，連教練都話冇遇過一個學生係笑成咁，我老公都控制唔到我，佢話我唔專心喎！」雖然Ana被老公拒絕一齊打boxing，但Ana就十分愛看老公打boxing的樣子，覺得非常吸引：「當佢好集中去出拳嘅時候，真係好性感。（睇其他人練拳都覺得性感？）咁要視乎個樣，但我老公係我鍾意嗰類型嘛！」

文：名人組

服裝：Adidas

場地：Seasons Fitness