韓流襲港已有一段日子，除K-pop和韓劇受熱捧外，就連時尚界都受影響，形成一種「Korean style」新潮勢。來自韓星的他與她在鏡頭前都有專人執靚啲、執型啲，但鏡頭的造型配搭全靠自己，即見「真章」，而星級造型師郭慶彬（Ricky）大讚Big Bang成員G-Dragon的灰色圖案tee加條爛牛仔褲，充滿街頭punk味，而另一成員Tae Yang獨有的口罩同紳士帽造型，好有巨星排場，兩個都型到爆！
佢一身簡簡單單嘅打扮都唔錯，好smart casual，而黃色手袋係造型亮點，襯埋呢款貼腳褲，凸顯到佢雙腿好修長，打扮雖唔算係好靚，但就有時代感。
呢身打扮好有型，有種street chic，最鍾意係佢襯對高跟鞋，拉長佢身段比例，睇落去好高挑，加埋個clutch，亦好有時代感，令佢呢身打扮變型咗。
型到震，格仔係今期最流行圖案，呢身簡單全黑打扮，配搭格仔無袖恤衫，可以騷到佢粗壯嘅麒麟臂，而戴上口罩同紳士帽，凸顯到佢獨有造型，好有巨星排場。
簡直型到爆，要讚係佢身形細粒，但着乜上身都型味出眾，灰色圖案tee加條爛牛仔褲，充滿街頭punk味，黑超同帽令佢造型更錦上添花，更fashionable，近年潮男指標。
幾有型，隨意咁襯T恤、牛仔褲同loafers，呢身打扮係最有型，而亮點係頂紳士帽同黑超，令佢星味更濃，唔需要整色整水都一樣有型格。
全黑打扮最穩陣，又容易着得型，奈何佢有肉底，着起鬆鬆地長衫配貼身褲，完全將佢肥嘟嘟嘅身形表露出來，不過好彩有佢把金髮同長頸鏈補救，令佢造型加分，冇跌佢韓界潮人嘅招牌。
牛仔褲一年興足三百六十日，從來冇out過，而爛牛仔褲就成為近年大熱打扮，無論長、短或貼褲款式都爛得有種rock嘅型味。另一方面短褲亦是今期流行，以素色為主，卻質料豐富，令造型上更變化萬千。
花裙一啲都唔娘，而且粉紅色tone配紅色手袋，簡直絕襯，感覺好有summer mood，加埋佢一頭長金髮同白雪雪嘅皮膚，造型好搶眼，很有少女味道。
著名星級造型師郭慶彬（Ricky）曾遠赴米蘭與巴黎時裝周，出席品牌有Max Mara、Chanel、Valentino、Gucci等品牌，也曾被邀在中國時尚節目《美麗俏佳人》擔任嘉賓主持，現於電台擔任客席嘉賓大談時裝之道與配搭技巧，近年也被各大品牌邀請客串造型顧問，為VIP提供服飾資訊與配搭技巧。Ricky曾為李冰冰、吳君如與張惠妹等擔任造型師，地位被肯定。