張家輝挑機食發哥檸檬
影帝張家輝積極行善，大玩時下流行的「冰桶挑戰」，結果慘食好友檸檬！同場的導演王晶拒絕收回日前維護愛女王子涵而發的「食屎論」，暗斥有人抽水，但強調不會為囡囡入行「鋪路搭橋」，希望對方一切靠自己。
張家輝、余文樂、王詩齡及王晶等昨早雲集元朗片場，繼續為《賭城風雲2》拍攝一場機艙戲。家輝近日風塵僕僕，剛完成新片內地宣傳，返港後隨即投入拍攝工作，難得他精神奕奕。談到日前他為支持肌肉萎縮側索硬化症（ALS）「自編自導自演」的淋冰短片，他不禁笑說：「嗰日喺上海做嘢，一起身牙未刷就拍！不過我tag咗嘅發哥、王晶同劉偉強全部都派檸檬，有日同劉偉強開工佢話會『找數』，點知最後都唔記得咗。」家輝表示有感社會太多爭吵，故自己想為幫人而出力，對於慘「食檸檬」，他無奈謂：「唔緊要啦，佢哋3個平日都做善事嘅。」
王晶拒收「食屎論」
現場所見，小詩齡與王晶異常投契，經常聚在一起，原來在泰國拍外景期間，二人經常遇上塞車，結果漸生感情，王晶透露：「喺車度冇嘢做，咪講古仔畀佢聽囉。」至於導演劉國昌力邀王子涵露點演出新片，身為子涵父親的晶哥怒不可遏發表「食屎論」，昨日他仍然怒氣未息：「我都未講『見鑊打鑊』呀。（搵對方溝通？）佢搵我囉，佢又唔係唔識我，但可能中間出咗啲問題啦。」晶哥又坦言絕不偏私，《賭2》片開拍以來一直未有打算安排角色「栽培」子涵：「佢要自己累積多啲演出經驗。（幫佢搭路？）唔會刻意，當年我父親都冇咁做，佢已經比其他人着數，係人都知道佢係王晶個女。」同場的余文樂則一臉疲態現身，不用埋位即走出影棚透氣休息。
文：影視組