歐陽巧瑩X劉佩玥 冷熱姊妹花

M：劉佩玥（Moon）

T：歐陽巧瑩（Tammy）

老友鬼鬼的劉佩玥和歐陽巧瑩曾一同出席慈善活動。

外表Cool爆的歐陽巧瑩被劉佩玥融化，成為無所不談好姊妹。

選美結緣

M：我記得第一次見你嘅時候，覺得你好Cool、好有殺氣，我心諗：「嘩！呢個女仔好型呀！」第一次見你我就知你一定可以入圍！

歐陽巧瑩在選港姐期間面對不少壓力，幸有劉佩玥開解。	性格開朗的劉佩玥樂於做聆聽者。	「傻大姐」歐陽巧瑩只想追求簡單的愛情。
劉佩玥（右二）將參演《四個女仔三個Bar》，表示會珍惜機會。	歐陽巧瑩被毛蟲嚇到打冷震，因而被劉佩玥取笑！

T：第二次見你，你坐喺我隔籬，係咁同Grace（陳凱琳）傾偈，嘈到不得了，仲要捉埋我一齊玩遊戲，諗番都覺得好好笑！

M：係呀，嗰日等咁耐悶吖嘛！我見你一個人坐喺度個樣咁Cool，咁咪撩你玩囉，你又肯喎！

T：仲好講！嗰日我皮膚敏感，成個身都好痕，已經唔想講嘢，你哋仲撩我玩遊戲！

M：選港姐嘅時候，你畀人話你係是非港姐，當時我可以做嘅，就係同你傾偈。

T：其實情緒最差嘅時候，係選完港姐之後，嗰段時間先有機會睇番啲報道，壓力令到我額頭狂爆瘡、又變肥。

M：我知道你唔開心，所以日日同你傾偈，同你去街同你去食嘢，等你減壓，你情緒已經差，唔通我仲逼你唔食嘢咩！

互相影響

M：你係一個好慢熱嘅人，好內向、收埋自己，睇落去好似好Cool、好有殺氣，又唔鍾意同人打交道。

T：我同你性格真係完全相反，你好動、好多嘢講、又唔怕陌生，不過呢一年裏面，我真係畀你改變唔少，變得比以前開朗。

M：一年前嘅你同依家嘅你真係好唔同，依家你會肯同我講心底裏嘅說話，能夠改變到你，我真係好有成功感！

T：我連我屋企嘅小新、小白都介紹畀你認識，你睇我對你幾好！佢哋係我命根嚟o架！

M：小新、小白係你屋企兩隻公仔嚟o架！

T：同你傾偈，真係好舒服，你係一個好好嘅聆聽者，聽完會畀意見，證明你真係用心聽我講嘢。

M：你就唔容易同人做到好好嘅朋友，我都好開心你肯同我交心做朋友。

T：依家事無大小我都會同你傾，好似今日咁，出門口前畀人激親我都會打畀你！

M：我都冇諗過，原來我可以帶畀你歡樂！其實同你唔熟嘅人就會叫你做Tammy，熟嘅人就叫你小明，因為熟落先會知你係一個傻大姐。

T：你咪又係，人大咗就會識保護自己，你都係了解咗我為人你先會同我傾咁多偈！

重友輕色

T：識你咁耐，發覺原來我都冇咩點同你傾愛情事！

M：係囉！因為大家都係重朋友多過重感情嘅人。

T：我記得有一次，有人話我知你講我壞話，一般女仔都係放喺心裏面，但我諗都唔諗就打畀你問！

M：我記得，當時我答你：「如果你問我有冇，我答你冇！」

T：你話冇，我信你！係真係信你o架！

M：最後find out到，原來話我講你壞話嗰個人，都有同我講你壞話！

T：我同你嘅愛情觀真係好唔同，我拍過四次拖，淨係要求簡單，大時大節唔好搞咁多小動作，唔使送花、唔好搞浪漫，想要一個似朋友嘅伴侶！

M：你就成個烈女咁，我覺得愛情係甜蜜、開心同幸福，係好夢幻嘅一件事，咁大個女都只係拍過兩次拖！

T：係呀！所以我哋都唔會爭仔啦！哈哈！

珍惜機會

M：當選港姐後，嚟緊第一次拍劇，拍《四個女仔三個Bar》，第一次拍劇係緊張啲，但我會珍惜機會。

T：我依家就裝備自己，咩都學吓，好似韓文、普通話，又去學潛水、演戲！

烈女怕蟲蟲

拍攝當日有部分場景都在草叢中，沒想到烈女歐陽巧瑩竟然被毛毛蟲嚇親，還不時打冷震、又覺得身痕，劉佩玥笑謂：「大家睇落去，都會以為我怕蛇蟲鼠蟻多過佢怕，其實我唔驚㗎！係佢驚之嘛！」外表弱質纖纖的劉佩玥原來唔怕曱甴、老鼠！

劉佩玥鞋履：Oriental Traffic

文：影視組