祥嫂斥冇知會 高志森拒孭鑊
李居明投資、尹光演出的《尹光唱盡新馬腔》前晚假新光戲院揭開序幕，三晚演出爆滿卻突然傳出是非，祥嫂洪金梅前晚接受新光網上數碼電台訪問，談及「不問自取」話題時，表示由於事前未獲知會，曾一度考慮向尹光之演出發出禁制令，在旁的李居明即說：「當我知道高志森（製作人）冇知會祥嫂，就即刻透過丘亞葵通知番。」又指高志森應向祥嫂道歉，祥嫂聞言滿意的說：「依家就友誼搭夠啦！」
高志森斥有人大做文章
由於有傳媒藉此大做文章，高志森覺得有澄清必要，主動聯絡記者說：「真係莫名其妙，我只係負責製作，賣idea畀李居明同新光，所有嘅公關工作都係新光方面負責，要通知祥嫂係咪應該由佢哋呢？況且今次我冇揭祥哥私隱及家事，只係重唱佢嘅金曲，打個比喻，如果有人出嚟唱歌唱得似梅艷芳，係咪又要通知梅媽呢？」
高志森直言不擔心因此影響與李居明的合作關係：「傾啱咪做，傾唔啱咪唔做囉。佢畀咗張紙我，提過嚟緊仲有十場演出可以傾。」另外，李居明透露有意為祥哥百歲冥壽舉行紀念活動。
文：影視組