張智霖親子泰優游 蔡少芬帶囡傳道特瞓
莘莘學子放暑假開心無限，星級父母亦做足準備工夫，張智霖巧妙地安排在開戲前放假，陪寶貝囝囝玩盡海陸空；至於蔡少芬亦不惜停工，日夜相伴兩個寶貝女，近日更和兩女遠赴外國傳道兼享受親子時光，齊過各自精彩的繽「fun」暑假！
踏入暑假，圈中星級父母均變得加倍忙碌，工作之餘更不能忽略家中正在放假的小寶貝，有人安排密集的興趣班讓子女增進知識，亦有人利用遊學增廣見聞，各出法寶均為了讓小朋友過一個愉快假期。當中「Cool魔」張智霖（Chilam）亦不例外，因為《衝上雲霄》電影版將遠赴英國拍外景，Chilam離港在即特別珍惜與囝囝同度的盛夏時光。
拖實魔童見醫生
日前下午3時多Chilam帶同現年七歲多的囝囝張慕童（魔童）現身中環，兩父子拖到實，魔童有爸爸相伴似是特別開心，只見他雀躍地說個不停，手舞足蹈，笑得天真可愛，至於戴黑超的Cool魔化身湊仔公一樣型到爆，及至記者上前拍照，Chilam笑笑口禮貌地透露陪囝囝見醫生：「唔係病，保健啫。」為了令囝囝有個難忘的假期，Chilam透露與太太袁詠儀帶同囝囝及一班好友到泰國布吉，特地安排陽光海灘之旅，他說：「囝囝鍾意游水囉，佢游得好叻，陽光海灘又可以relax吓！」
抱信兒買日用品
另外，星級媽媽蔡少芬（Ada）今個暑假亦全天候陪伴兩個寶貝女，日前Ada抱住細女信兒，在助手陪同到寓所附近的商場行街，Ada步入一間連鎖式藥房主攻BB用品，不一會已揀中一支嬰兒護膚霜。她往收款處付款期間，將囡囡放在櫃枱上，眼仔睩睩的信兒不時四圍望，又好奇伸出手仔觸摸櫃枱上的物品，十分可愛。
付款後，由囡囡拎住「戰利品」步出，Ada見到記者即友善打招呼，又企定定給記者拍照，問她是否帶囡囡行街？她說：「係呀！今日主要買護膚品畀囡囡，依家天口慶，順便落商場歎吓冷氣，屋企又喺附近。」說畢她便抱住囡囡步行回家，助手則自行離開。
Ada除了陪伴兩女，更帶同3歲的楚兒及1歲多的信兒，跟隨教會往美國三藩市宣道，三母女順道遊覽當地名勝，更嘗試在郊外露營瞓帳篷兼野餐，為兩女帶來特別體驗。Ada表示今個暑假沒有特別為女兒們報興趣班：「淨係帶咗佢哋去三藩市，想多的時間陪佢哋，明知之後返學好多功課，呢段時間畀佢哋Relax啲，享受吓假期。」
文、攝：追蹤組