林夏薇唔搭順峯車 地牢捱出頭
挾住林峯堂妹之名加入無綫的林夏薇，當年毅然放下劇團花旦身份，一切重新做起，於別人眼中，林夏薇是個富二代，根本不會為錢煩惱，但原來夏薇家訓嚴謹，當年隻身到北京考學校的她，亦住在更衣室般大的地下室，更要公共浴室，親身體驗過後令她知道賺錢艱難，故即使現時銀行有多少個零，也誓死不做大花筒，亦不願當名牌奴隸獸！
挾堂哥之名
在還未成為無綫藝人前，喺香港話劇團做咗一年全職演員，演過六套劇，其中幾套更做主角，記得在演《2029追殺...1989》時，劇團第一次請北京女仔當主角，當時好開心亦好心足。
直到後來堂家姐在廈門結婚，我在喜宴時被傳媒拍下照片，結果大家知道我是林峯的堂妹，一切亦因此改變，喺內地要有資歷才能當上主角，同香港制度唔同，章子怡跟我也是同門讀北京中央戲劇學院，但她比我早9年畢業，她最後也選擇於電影圈打滾，而我亦認為表演係相通，雖然決定與無綫簽約時亦有掙扎過，但最終決定把握機會，機緣下加入無綫大家庭。
初拍劇唔適應
而我第一套拍攝是處境劇《結‧分＠謊情式》，當時唔識拿捏，好在一班前輩願意指導，再加上有130多集可以慢慢適應，原本我連playback都唔識睇。到後來拍《幸福摩天輪》仍未習慣，我知自己好多地方不足，惟有一次比一次進步，每次也會熟讀劇本，做到唔拎劇本也可以，而往後的《初五啟示錄》、《單戀雙城》至《寒山潛龍》，戲份佔得較重，我就更畀心機，務求做好自己！
約會恨拍拖
很多人會覺得我是富家女，賺錢買花戴。事實上從小家教便要捱苦，養成有責任心，為向家人證明我是可以的，當日離鄉別井到北京，準備考入中央戲劇學院時，我也只是住在地下室，範圍僅有更衣室般大，淋浴也是公共浴室。
拒問家人攞錢
當時為咗有溫暖感悉心裝飾間房，牆紙、吊燈一手包辦，仲記得房東好開心，不時帶人到來參觀，結果我一住便半年，為何不遷到一些較好環境？因為租金已是我生活費的3分之1，但我唔想向家人攤大手攞錢，不想背棄當初對自己的承諾，因為親身體驗過，令我知道賺錢辛苦，絕不會胡亂花錢。
出外闖感孤獨
識我的朋友也認為我性格很強，其實我也有脆弱一面，多年來出外闖，壓力好大，每到一個地方一段日子，於熟悉與不熟悉之間，有時想找人傾訴，長居廈門的雙親不能常來港探望，有時都會想拍拖，以前我對這方面很抗拒，男仔約我食飯會匿埋，但最近開始想通，嘗試打開自己認識不同朋友，不一定是拍拖對象，但至少從談話過程豐富自己，何樂而不為呢！
後記
林夏薇給大家感覺向來爽朗，從沒有因堂哥林峯披第二張臉，她向筆者透露很多人在未認識她之前，聽過閒言閒語也會戴有色眼鏡看她，其後才大跌眼鏡，她深明不會全世界也喜歡她，接受負面聲音，更謂：「咁我要更加做好自己，將基本嘢做好，開工唔遲到，背熟劇本，問心無愧，其他嘢唔到我控制，我咪選擇性地去聽囉，自己都會開心啲。」
口述：林夏薇
攝影：樊愛慈
場地：Amaroni's Little Italy Hong Kong @ Festival Walk
化妝：Raymond Yip
髮型：Oscar @ Hair