Jeana衣櫃傳鬼聲 接午夜凶鈴
今天是農曆七月十四，亦稱鬼節，不少藝人都趁盂蘭節大講靈異經歷！「不倒胸」何佩瑜（Jeana）中學去深圳旅行，酒店衣櫃和廁所不僅傳出怪異聲響，更突然午夜凶「鈴」來襲，嚇到他們翌日急急退房！前港姐季軍莊思明小時候擁有陰陽眼，曾在家中見到已去世的祖母，至今仍歷歷在目！
相傳鬼節勁猛，夜麻麻出街隨時搞到心慌慌！今天正是農曆七月十四，一眾藝人不怕忌諱，齊講鬼古，當中以Jeana的經歷最觸目驚心！Jeana憶述中學時與三個好友到深圳酒店的恐怖經歷，至今仍猶有餘悸：「當時四個人住一間房，記得最後一晚凌晨時分熄燈諗住瞓覺，點知個衣櫃傳出呼吸聲，起初都冇乜點理，點知過咗陣啲聲愈嚟愈大，廁所同時傳出好大嘅水聲，呢個時候我朋友就望住我，大家起身諗住開燈，一開燈咩聲都冇。」
見房間回復平靜，Jeana與友人再次入睡，豈料關燈後衣櫃和廁所內再次傳出同樣的聲音，Jeana說︰「我哋開始覺得唔對路，於是開燈，啲聲又再停過，之後大家唔敢再熄燈。突然個電話響起，畀我叫醒嘅朋友就去聽，點知喂咗好耐都冇人出聲，之後收埋線。當時嘅環境太恐怖，搞到個個都唔敢瞓，直至天光就急急去check out走人。」
莊思明睹過世祖母
至於莊思敏細妹莊思華則爆孖生細妹莊思明擁有陰陽眼，搞到成日冇覺好瞓：「思明細個可以睇到靈異物體，曾喺屋企見到已過身嘅祖母，因為成日見到嘢，屋企人就帶佢去念經，雖然冇真正封眼，但佢大個真係少見嗰啲嘢！」
至於今年寫真大賣的蕊蕊表示雖然沒有撞邪經歷，但從小聽爸爸講的鬼古，曾令她失眠好幾個星期：「我爸爸係印尼華僑，佢細個仲喺印尼生活嗰陣，佢同我講有時食食吓飯，或者睇緊電視，就會有先人上嫲嫲嘅身，用番先人嘅神態同語氣講嘢，去講佢過成點同有乜心願未了。當時我爸爸得10歲左右，佢話見到好驚，成日唔知點算好，但當佢嚟咗香港，就冇再發生呢個情況。」
文：專案組