發哥出跪 嚇窒家輝
神級影帝周潤發出席新片《賭城風雲2》開鏡，貫徹其幽默作風，不但叫拍檔劉嘉玲永不言休，協助他繼續發展演藝事業外，又打趣稱站在張家輝旁邊頓變「發育不健全」，說到興起更單膝下跪向家輝「謝師」，感激他指點拳腳功夫，搞到家輝腼腆不已，即時下跪回敬！
發哥去年憑《賭城風雲》創下七億港元票房，電影公司決定「梅開二度」，找來張家輝、劉嘉玲及余文樂等加入，演出無綫有份投資的《賭城風雲2》，其他演員還有曾國祥、黃德斌、朱晨麗、「晶女郎」童菲及胡然等，續集並鎖定明年賀歲檔，昨午全體演員齊集電視城「晒冷」開鏡拜神，場面墟冚。發哥恍如皇帝出巡般受歡迎，不費吹灰之力已成風頭躉。
練成九陰真經
為了配合角色，發哥減去卅磅之餘，戲中更「越級挑戰」與盧惠光對打，發哥在台上發揮幽默本色說：「張家輝激戰，我就打泰拳，企喺佢隔籬我好似發育不健全咁。佢係師傅指點我，我就係彭于晏，師傅請受徒弟一拜！」並即時下跪，令一向轉數快的家輝為之腼腆不已，惟有下跪回敬笑說：「以前同發哥合照，張相都要貼喺床頭增強演藝功力，今次能夠同佢合作，覺得自己好似練成『九陰真經』咁囉！」
今次戲中發哥與嘉玲被配成一對，日前於泰國外景，二人更拍了三幕親嘴戲，發哥在台上說：「劇組為咗營造氣氛，買咗支二千幾蚊嘅香檳，點知嘉玲飲到一滴都冇留畀我！」接受訪問時他再被追問與嘉玲親嘴的感覺，發哥說：「第一次溫馨浪漫嘅，第二次就有啲苦澀……」他更「叮囑」嘉玲不要退休：「我以前啲女拍檔，生仔嘅生仔，搞環保嘅搞環保，唱歌嘅唱歌……我第二日拍戲就靠晒你嘞！」站在旁邊的嘉玲就答：「我實陪你，但你要睇住我喎。」
約埋一齊行山
注重健康生活的發哥更即場相約嘉玲待「處暑」過後，齊齊去郊遊行山，嘉玲扁嘴說：「我攞兩隻蕉咋，啲水咁重你囉。（叫埋偉仔？）都好喎。」據悉，他倆稍後還要在香港及澳門取景，劇情交代二人於三萬呎高空的飛機上，展開生死對決，嘉玲鮮有地於大銀幕上一露身手，發哥說：「總之我哋有愛情、激情同打情啦。」
文：影視組