黃榕酒店床底驚見紅鞋

除了仙樂都及劉俐等組成「探靈旅行團」外，據知性感女星黃榕原本亦有份參與，但因她日前出埠工作時亦發生靈異事件，驚魂未定的她決定臨時縮沙。黃榕昨日受訪時承認其事，提起靈異事仍猶有餘悸：「之前去登台做騷，喺酒店房覺得好唔妥，電視無端端又開又關，又陰風陣陣，搵搵吓嘢仲發現有一隻紅色高踭鞋喺床下底！嚇到我成晚唔敢瞓！我好驚農曆七月咁猛會再撞嘢，所以都係唔去（探靈）喇！其實呢幾晚都瞓得唔係咁好，如果再係咁，會搵師傅做啲法事。」